ටෙක්සාස්හි තෙල් පිරිපහදුවක දැවැන්ත පිපිරීමක්

අමෙරිකාවේ ටෙක්සාස්හි පෝට් ආතර් (Port Arthur) හි පිහිටි වැලෙරෝ (Valero) පිරිපහදුවේ දැවැන්ත පිපිරීමක් සිදු වූ බව විදෙස් මාධ්‍ය වාර්තා කරනවා.

ඒ හේතුවෙන් බලධාරීන් විසින් ප්‍රදේශවාසීන්ට ආරක්ෂිත ස්ථානවල රැඳී සිටින ලෙස (shelter-in-place) හදිසි අනතුරු ඇඟවීමක් නිකුත් කර තිබෙනවා.

පෝට් ආතර් නගරයේ නිල වෙබ් අඩවිය සඳහන් කළේ, අවට වෙසෙන සියලුම වැසියන්ගේ ආරක්ෂාව තහවුරු කිරීම සඳහා මෙම අනතුරු ඇඟවීම නිකුත් කළ බවයි.

මෙම පිපිරීමෙන් පසු, පෝට් ආතර් නගර පරිපාලනය විසින් සබීන් පාස් (Sabine Pass), ප්ලෙෂර් අයිලන්ඩ් (Pleasure Island), 73 වන මහා මාර්ගයට දකුණින් වූ ප්‍රදේශ සහ ස්ටිල්වෙල් බුලවාර්ඩ් (Stirlwell Boulevard) සිට බටහිර දෙසට වන ප්‍රදේශ සඳහායි මෙම හදිසි ආරක්ෂණ නියෝගය නිකුත් කර ඇත්තේ.

එරට මාධ්‍ය උපුටා දක්වමින් රොයිටර් පුවත් සේවය වාර්තා කළේ, දිනකට බැරල් 380,000ක ධාරිතාවයකින් යුත් මෙම පිරිපහදුවේ ගින්න හටගත් බවයි.

CBS පුවත් සේවයේ අනුබද්ධිත ආයතනයක් වන KFDM වාර්තා කර තිබුණේ, මෙම සිදුවීමෙන් කිසිදු පුද්ගලයෙකුට තුවාල සිදුවී නොමැති බවත්, පිපිරීම බොහෝ දුරට කාර්මික හීටරයක් (industrial heater) හේතුවෙන් සිදුවන්නට ඇති බවත්, ෂෙරිෆ් සෙනා ස්ටීවන්ස් ප්‍රකාශ කළ බවයි.