අත්අඩංගුවට ගත් හිටපු පා.ම. චන්දන කත්‍රිආරච්චි රඳවාගෙන ප්‍රශ්න කෙරෙන ලකුණු

නීතිවිරෝධී ගිනි අවි ළඟ තබා ගැනීමේ චෝදනාව මත කොළඹ අපරාධ කොට්ඨාසය විසින් ඊයේ (16) අත්අඩංගුවට ගත් හිටපු පාර්ලිමේන්තු මන්ත්‍රී චන්දන කත්‍රිආරච්චි සම්බන්ධයෙන් රැඳවුම් නියෝග යටතේ ඉදිරි විමර්ශන සිදුකිරීමට බලාපොරොත්තු වන බව පොලිසිය සඳහන් කළා.

කැස්බෑව මහේස්ත්‍රාත් අධිකරණයෙන් ලබාගත් සෝදිසි වරෙන්තුවක් මත පොලිසිය පිළියන්දල මාම්පේ පිහිටි ඔහුගේ නිවස ඊයේ උදෑසන පරීක්ෂාවට ලක්කළ අතර, එහිදී ටී 56 වර්ගයේ මැගසීන් දෙකක්, එම වර්ගයේ ගිනි අවි සඳහා භාවිත කරන ජීව උණ්ඩ 221ක්, එයිටි ෆෝ එස් වර්ගයේ ජීව උණ්ඩ 31ක් සොයා ගැණුනා.

ඊට අමතරව රිවෝල්වර සඳහා භාවිත කරන ටූ පොයින්ට් ටූ වර්ගයේ ජීව උණ්ඩ 103ක් සහ ජීව අත්බෝම්බයක් ද එහිදී සොයා ගත්තා.

ඊට අමතරව මිලිමීටර් 9 වර්ගයේ පිස්තෝල 2ක්, බෝර 12 ගිනි අවියක් සහ බෝර 16 වර්ගයේ ගිනි අවියක් ද හමුවී ඇති අතර, එම ගිනි අවි චන්දන කත්‍රිආරච්චිගේ සහ දැනට විදෙස් ගතව සිටින ඔහුගේ බිරිඳට අයත් නීත්‍යානුකූල ගිනි අවි බවටයි හෙළි වුණේ.

පොලිස් භාරයට ගත් ජීව අත්බෝම්බය පොලිස් විශේෂ කාර්ය බලාකායේ බෝම්බ නිෂ්ක්‍රීය අංශය විසින් ඊයේ පස්වරුවේ නිෂ්ක්‍රීය කරනු ලැබුවා.