ඊශ්‍රායල ප්‍රහාරවලින් ලෙබනනයේ හමුදා ප්‍රධානීන් ඇතුළු 12ක් මරුට

ලෙබනන දකුණු ප්‍රදේශයට ඊශ්‍රායලය එල්ල කළ දරුණු ගුවන් ප්‍රහාර හේතුවෙන් එරට හමුදාවේ ඉහළ පෙළේ නිලධාරීන් ඇතුළු පුද්ගලයින් 12 දෙනෙකු ජීවිතක්ෂයට පත්ව තිබෙන බව විදෙස් මාධ්‍ය වාර්තා කරනවා.

දෙරට අතර අන්‍යෝන්‍ය එකඟතාවයකින් යුතුව තාවකාලික සටන් විරාමයක් ප්‍රකාශයට පත් කර දින කිහිපයක් ගතවීමටත් මත්තෙන් මෙම ප්‍රහාර මාලාව එල්ල වී තිබුණා.

ලෙබනන හමුදාව නිල වශයෙන් තහවුරු කරන පරිදි, බ්‍රිගේඩියර් ජෙනරාල් වසම් සබ්‍රා (Wassam Sabra), කපිතාන් එලී ඛූරි (Elie Khoury) සහ හුසේන් ගොසාල් (Hussein Ghozal) නමැති සාමාන්‍ය වැසියෙකු (හමුදා සෙබළෙකු) ඛර්දාලි-නබටියේ (Khardali-Nabatieh) මාර්ගයේ හමුදා රථයකින් ගමන් කරමින් සිටියදී ඊශ්‍රායල ප්‍රහාරයට ලක්ව මෙලෙස මියගොස් තිබෙන බව සඳහන්.

මෙම ප්‍රහාරය සම්බන්ධයෙන් නිවේදනයක් නිකුත් කරමින් ඊශ්‍රායල හමුදාව පවසා සිටියේ, අදාල ප්‍රහාරය එල්ල වූයේ ක්‍රියාකාරී සටන් කලාපයක් (Active Combat Zone) තුළ බවත්, එවැනි කලාපයක සිදුවන ඕනෑම ගමනාගමනයක් කලින් ඊශ්‍රායල හමුදාව සමග සම්බන්ධීකරණය කරගත යුතු බවයි.

කෙසේ වෙතත්, මේ පිළිබඳව වැඩිදුර විමර්ශන පවත්වන බවද සඳහන්.

මෙම සිදුවීම දැඩි ලෙස හෙළා දකිමින් ලෙබනන ජනාධිපති ජෝසෆ් අවුන් (Joseph Aoun) ප්‍රකාශ කළේ, මෙය ලෙබනනයේ ස්වෛරීභාවය මෙන්ම ජාත්‍යන්තර නීති රීති පද්ධතිය මුළුමනින්ම උල්ලංඝනය කිරීමක් බවයි.

එමෙන්ම, ලෙබනන අග්‍රාමාත්‍ය නවාෆ් සලාම් (Nawaf Salam) මෙය ලෙබනන වැසියන්ට එල්ල වූ පිළිකුල් සහගත අපරාධයක් ලෙස හඳුන්වමින් මියගිය නිලධාරීන්ගේ පවුල් වෙත සිය ශෝකය ප්‍රකාශ කර තිබුණා.

ලෙබනන හමුදාව පෙන්වා දෙන්නේ ඊශ්‍රායලය දිගින් දිගටම සිදුකරන මෙම කුරිරු ප්‍රහාරයන්ගේ මූලික අරමුණ දෙරට අතර සාමකාමී විසඳුමකට එළඹීමට පවතින උත්සාහයන් කඩාකප්පල් කිරීම බවයි.

මේ අතර, ලෙබනන හමුදාපති ජෙනරාල් රුඩොල්ෆ් හයිකල් (Rudolf Haykal) විශේෂ සාකච්ඡාවක් සඳහා පාකිස්ථානය බලා පිටත්ව ගොස් තිබෙනවා.

අමෙරිකාව සහ ඊශ්‍රායලය එක්ව ඉරානයට එරෙහිව දියත් කර ඇති යුදමය තත්ත්වය සමනය කිරීම සඳහා පාකිස්ථානය මැදිහත් වී පවත්වන සාම සාකච්ඡාවලට සහභාගී වීම ඔහුගේ මෙම සංචාරයේ ප්‍රධාන අරමුණක් වන අතර, ලෙබනනයට එල්ල වන ඊශ්‍රායල ප්‍රහාර මෙහිදී ප්‍රධාන වශයෙන් සාකච්ඡාවට බඳුන් වීමට නියමිතයි.

මූලාශ්‍ර : අල්ජසීරා