මෙටා සමාගම ඉන්දියාවේ මුල්ම AI දත්ත මධ්‍යස්ථානය පිහිටුවීමට මුකේෂ් අම්බානි සමග අත්වැල් බැඳගනී!

ෆේස්බුක්, ඉන්ස්ටග්‍රෑම් සහ වට්ස්ඇප් සමාගම්වල මව් සමාගම වන ඇමරිකාවේ 'මෙටා' (Meta) සමාගම, ඉන්දියාව තුළ සිය ප්‍රථම කෘතිම බුද්ධි දත්ත මධ්‍යස්ථානය (AI Data Center) පිහිටුවීම සඳහා ආසියාවේ ප්‍රකෝටිපති මුකේෂ් අම්බානිගේ 'රිලයන්ස් ඉන්ඩස්ට්‍රීස්' (Reliance Industries) සමාගම සමග සුවිශේෂී උපායමාර්ගික සන්ධානයකට එළඹ ඇති බව නිල වශයෙන් වාර්තා වෙනවා.

මෙම දැවැන්ත ව්‍යාපෘතිය යටතේ මෙටා සමාගම විසින් ඉන්දියාවේ ගුජරාට් ප්‍රාන්තයේ පිහිටි 'ගිෆ්ට් සිටි' (GIFT City - Gujarat Inteational Finance Tec-City) හි රිලයන්ස් සමාගමට අයත් අතිනවීන දත්ත මධ්‍යස්ථාන පරිශ්‍රය තුළ සිය AI දත්ත මධ්‍යස්ථානය ස්ථාපිත කිරීමට නියමිතයි. මෙය ඉන්දියාවේ වේගයෙන් වර්ධනය වන AI තාක්ෂණික ක්ෂේත්‍රයේ සිදුකෙරෙන සුවිශේෂී සන්ධිස්ථානයක් ලෙස සැලකෙනවා.

ඉන්දියානු රජය විසින් මෑතකදී හඳුන්වා දුන් දත්ත ආරක්ෂණ පනත් (Digital Personal Data Protection Act) ප්‍රකාරව, ඉන්දියානු පරිශීලකයන්ගේ සංවේදී දත්ත රට තුළම ගබඩා කිරීම (Data Localization) අනිවාර්ය වෙනවා.

මෙටා සමාගම මෙතෙක් ඉන්දියානු පරිශීලකයන්ගේ දත්ත සිංගප්පූරුවේ පිහිටි දත්ත මධ්‍යස්ථානය වෙත යොමු කර සැකසූ අතර, මෙම නව මධ්‍යස්ථානය හරහා එම සියලු දත්ත ඉන්දියාව තුළම සුරක්ෂිතව තබා ගැනීමට අවස්ථාව හිමිවෙනවා.

මෙටා සමාගම සතු විශාලතම පරිශීලක පදනම (User base) පවතින්නේ ඉන්දියාව තුළයි (විශේෂයෙන්ම වට්ස්ඇප් සහ ඉන්ස්ටග්‍රෑම් සඳහා).

මෙම නව දේශීය AI දත්ත මධ්‍යස්ථානය හරහා 'Meta AI' චැට්බොට් (Chatbot) පහසුකම්, රීල්ස් (Reels) නිර්දේශ කිරීම් සහ පරිශීලක අත්දැකීම් ඉතාමත් වේගයෙන් සහ අවම ප්‍රමාදයකින් (Low latency) සැපයීමට මෙටා සමාගමට හැකියාව ලැබෙනු ඇති.

රිලයන්ස් සමාගම සතු දැවැන්ත ඩිජිටල් සහ විදුලි සංදේශ ජාලය වන 'ජියෝ' (Jio) හරහා මෙටා හි නව AI මෙහෙයුම් සඳහා අවශ්‍ය ඉහළ කලාප පළලකින් යුත් සන්නිවේදන යටිතල පහසුකම් (High-bandwidth infrastructure) සහ හරිත බලශක්තිය (Green energy) සැපයීමට මුකේෂ් අම්බානි සැලසුම් කර තිබෙනවා.