ඉරානයෙන් බහරේනයේ අමෙරිකානු නාවික හමුදා පස්වන බලඇණියට ප්‍රහාරයක්

බහරේනයේ පිහිටි අමෙරිකානු නාවික හමුදාවේ පස්වන බලඇණි මූලස්ථානය වෙත තම නාවික හමුදාව විසින් ඩ්‍රෝන ප්‍රහාරයක් එල්ල කළ බව ඉරානයේ ඉස්ලාමීය විප්ලවීය ආරක්ෂක බලකාය (IRGC) ප්‍රකාශ කර තිබෙනවා.

විදෙස් මාධ්‍යට අනුව ඔවුන් සඳහන් කර ඇත්තේ, මෙම ප්‍රහාරය මෑතකදී දකුණු ඉරානයේ යටිතල පහසුකම් ඉලක්ක කර ගනිමින් අමෙරිකාව එල්ල කළ ප්‍රහාරවලට පළිගැනීමක් වශයෙන් සිදුකළ එකක් බවයි.

නිවේදනයක් නිකුත් කරමින් IRGC සඳහන් කර තිබෙන්නේ, එරට වේලාවෙන් අද (10) අලුයම 2:30ට පමණ මැනාමා හි පිහිටි පස්වන නාවික බලඇණි කඳවුර ඉලක්ක කර ගනිමින් 'ෂහීඩ්-136' (Shahed-136) වර්ගයේ එක්වරක් පමණක් ප්‍රහාර එල්ල කළ හැකි (one-way) ඩ්‍රෝන යානා යෙදවූ බවයි.

ඉරානයේ දකුණු වෙරළ තීරයේ පිහිටි ජාස්ක් (Jask), සිරින්ක් (Sirik) සහ කේෂ්ම් (Qeshm) යන ප්‍රදේශවලට අමෙරිකාව එල්ල කළ ප්‍රහාරවලින් විදුලි සංදේශ කුළුණකට හානි සිදුවී ඇති බවත්, බෙමානි දිස්ත්‍රික්කයේ ජල ගබඩා ටැංකි දෙකක් විනාශ වී ඇති බවත් වාර්තා වී ඇති අතර, මෙම මෙහෙයුම දියත් කළේ ඊට ප්‍රතිචාර වශයෙන් බව එම සංවිධානය ප්‍රකාශ කර ඇති බවයි විදෙස් මාධ්‍ය වැඩිදුරටත් සඳහන් කරන්නේ.