තායිවාන යුද අභ්‍යාස මධ්‍යයේ චීනයේ නවතම යුද නැව තායිවාන සමුද්‍ර සන්ධිය හරහා යාත්‍රා කරයි

චීනය සතු ගුවන් යානා ප්‍රවාහන නෞකා තුන අතුරින් නවතම සහ බලවත්ම නෞකාව පසුගිය අඟහරුවාදා තායිවාන සමුද්‍ර සන්ධිය හරහා යාත්‍රා කර ඇති බව තායිවාන ආරක්ෂක අමාත්‍යාංශය පවසනවා.

චීනයෙන් එල්ල විය හැකි ආක්‍රමණශීලී ප්‍රහාරයකට ප්‍රතිචාර දක්වන ආකාරය පිළිබඳව තායිවානය දින පහක විශේෂ යුද අභ්‍යාසයක් ආරම්භ කර දිනකට පසුව චීනය මෙම පියවර ගෙන තිබෙනවා.

'ෆූජියන්' (Fujian) ලෙස නම් කර ඇති මෙම දැවැන්ත ගුවන් යානා ප්‍රවාහන නෞකාව, චීනය සහ තායිවානය වෙන් කරන පටු මුහුදු තීරය හරහා ප්‍රථම වරට අත්හදා බැලීමේ ගමනක නිරත වූයේ පසුගිය සැප්තැම්බර් මාසයේදීයි.

අනතුරුව, පසුගිය දෙසැම්බර් මාසයේදී නිල වශයෙන් සේවයට අනුයුක්ත කළ යුද නෞකාවක් ලෙස එය පළමු වරට මෙම සමුද්‍ර සන්ධිය හරහා ගමන් කළා.

තායිවානය තමන් සතු ස්වයං පාලන දූපතක් ලෙස හිමිකම් කියන චීන රජය, එය බීජිං පාලනය යටතට ගැනීම සඳහා අවශ්‍ය වුවහොත් බලය භාවිතා කිරීමේ හැකියාව ද බැහැර කර නැහැ.

චීනය නිරන්තරයෙන්ම තායිවාන දේශසීමා දෙසට නාවික සහ ගුවන් යුද යානා එවමින් යුද අභ්‍යාස පවත්වන අතර, මෑත වසරවලදී ඒවා කොතරම් නිතර සිදුවූයේද යත්, වර්තමානයේදී එය දිනපතාම පාහේ සිදුවන තත්ත්වයකට පත්ව තිබෙනවා.

චීන හමුදා ආක්‍රමණයක් සිදුවුවහොත් ඊට සාර්ථකව මුහුණ දීම සඳහා තායිවානය ද සිය දින පහක යුද අභ්‍යාස මාලාව පසුගිය සඳුදා ආරම්භ කළා.

බලහත්කාරයෙන් තායිවානය යටත් කර ගැනීමට චීනය දරන ඕනෑම උත්සාහයකට අනතුරු ඇඟවීමක් කරමින්, ඇමෙරිකානු නාවික හමුදාව මෙන්ම ඔවුන්ගේ මිත්‍ර රටවල් ද වරින් වර මෙම සමුද්‍ර සන්ධිය හරහා සිය යුද නැව් යාත්‍රා කරවීමට පියවර ගනිමින් සිටිනවා.