''අද වන විට අපේ රට නව බලාපොරොත්තුවක් පෙරදැරිව ගමනක් ආරම්භ කර තිබේ, මෙම ගමන සාර්ථක කර ගැනීම සඳහා ආර්ථික ප්‍රගතිය පමණක් ප්‍රමාණවත් නොවේ, සදාචාරාත්මක වටිනාකම්වලින් පිරිපුන් සමාජයක් ද අපට අවශ්‍යයි'' - අගමැතිනියගේ පොසොන් දින පණිවිඩය

වර්තමානය වන විට ශ්‍රී නව බලාපොරොත්තුවක් පෙරදැරිව ගමනක් ආරම්භ කර තිබෙන බවත් මෙම ගමන සාර්ථක කර ගැනීම සඳහා ආර්ථික ප්‍රගතිය පමණක් ප්‍රමාණවත් නොවේ. සදාචාරාත්මක වටිනාකම්වලින් පිරිපුන් සමාජයක් අවශ්‍ය බවත් අගමැතිනි ආචාර්‍ය හරිනි අමරසූරිය පවසනවා.

අගමැතිනිය මේ පිළිබඳව සඳහන්කර සිටියේ පොසොන් පොහෝ දින පණිවිඩයක් නිකුත් කරමින්.

අගමැතිනිය නිකුත් කළ පණිවිඩය පහතින්.

''මිහිඳු මහරහතන් වහන්සේගේ ලංකාගමනයෙන් ශ්‍රී ලංකාව තුළ බුද්ධ ශාසනය පිහිටුවීම සිහිපත් කෙරෙන උතුම් පොසොන් පුර පසළොස්වක පොහොය දිනය, ආධ්‍යාත්මික පිබිදීම, ප්‍රඥාව සහ සමාජයීය සමගිය අපට සිහිපත් කර දෙන උදාර පුණ්‍ය දිනයකි.පොසොන් පොහොය දිනය ශ්‍රී ලාංකීය ඉතිහාසයේ ආගමික වතාවත්වලට පමණක් සීමා වූවක් නොවන අතර, එය සමස්ත ජාතියකගේම සංස්කෘතිය, සදාචාරාත්මක ජීවන රටාව සහ චින්තනය පරිවර්තනය කළ සංකේතයක් ද වෙයි. මිහිඳු මහරහතන් වහන්සේගේ ලංකාගමනයත් සමඟ මෙරටට දායාද වූ බෞද්ධ දර්ශනය, සියවස් ගණනාවක් පුරා අපගේ ජාතික අනන්‍යතාව හැඩගැස්වීමට සමත් විය.
සැබෑ සංවර්ධනය ආරම්භ වන්නේ මිනිස් සිතින් බව පොසොන් පොහොය දිනය අපට මතක් කර දෙයි. කරුණාව, දයාව, සමානාත්මතාවය, විනය සහ වගකීම වැනි උතුම් මානව සාරධර්ම මත පදනම් වූ සමාජයක් ගොඩනැඟීම තුළින්, සාමකාමී, සාධාරණ සහ සමෘද්ධිමත් ශ්‍රී ලංකාවක් බිහිකිරීමේ පොදු අරමුණ සාක්ෂාත් කර ගැනීමට අපට හැකියාව ලැබෙනු ඇත. අද වන විට අපේ රට නව බලාපොරොත්තුවක් පෙරදැරිව ගමනක් ආරම්භ කර තිබේ. මෙම ගමන සාර්ථක කර ගැනීම සඳහා ආර්ථික ප්‍රගතිය පමණක් ප්‍රමාණවත් නොවේ. සදාචාරාත්මක වටිනාකම්වලින් පිරිපුන් සමාජයක් ද අපට අවශ්‍ය වේ. සදාචාරය, අවිහිංසාව සහ කරුණාව අගය කරන පොසොන් පොහොය දිනයේ සැබෑ හරය, විනයගරුක සහ සමෘද්ධිමත් සමාජයක් ගොඩනැඟීම උදෙසා රජය සතු දැක්මට මඟපෙන්වන ආලෝකයක් වනු නොඅනුමානය.මෙම උතුම් වූ පොසොන් පුර පසළොස්වක පොහොය දිනයේදී, සමස්ත බෞද්ධ ජනතාවට සාමය, ප්‍රඥාව සහ සමෘද්ධිය ප්‍රාර්ථනා කරමි.''