සූපවේදීන්ගේ ලෝක මට්ටමේ තරගයකදී ශ්‍රී ලංකාවට රිදී පදක්කමක්

ජාත්‍යන්තර සූපවේදී ක්ෂේත්‍රය තුළ ශ්‍රී ලංකාවේ නාමය රන් අකුරින් සනිටුහන් කරමින්, 2026 කීර්තිමත් "SCO ගිම්හාන" (SCO Summer) සූපවේදීන්ගේ තරගයේදී රිදී පදක්කම දිනා ගැනීමට ශ්‍රී ලාංකික සූපවේදී කණ්ඩායම සමත් වී තිබෙනවා.

පසුගිය ජුනි 26 සහ 27 යන දිනවල චීනයේ චින්ඩාවෝ (Qingdao) හිදී මෙම තරගාවලිය පවත්වා ඇති බවයි සඳහන්.

ලෝකයේ දක්ෂතම සූපවේදීන් රැසක් එක්වූ මෙම තරගාවලිය සඳහා චීනය, රුසියාව, කසකස්ථානය, උස්බෙකිස්ථානය සහ අසර්බයිජානය වැනි ප්‍රබල රටවල් නියෝජනය කරමින් කණ්ඩායම් සහභාගී වී තිබෙනවා.

චීනයේ බෙයිජිං නුවර පිහිටි ශ්‍රී ලාංකික අවන්හලක් නියෝජනය කරමින් මෙම තරගයට එක්වූයේ එහි ප්‍රධාන සූපවේදී නිෂාඩ් සමරනායක සහ සහායක සූපවේදී මනෝජ් ලියනගේ යන අයයි.

ඔවුන් විසින් තරගය සඳහා ශ්‍රී ලංකාවටම අනන්‍ය වූ සාම්ප්‍රදායික කිරිබත් සහ පොල් රොටි ඇතුළු ලාංකික ආහාර වට්ටෝරු කිහිපයක් ඉදිරිපත් කර ඇති අතර, එහිදී ලාංකික කුළුබඩුවලින් පදම් වූ මෙම ආහාර, ඉහළ පෙළේ චීන සූපවේදීන්ගේ මෙන්ම ජාත්‍යන්තර ආහාර විශේෂඥයින්ගේ දැඩි ඇගයීමට හා ප්‍රශංසාවට ලක්වී තිබෙනවා.

මෙහිදී, සූපවේදී ක්ෂේත්‍රයේ වාර්තා අලුත් කරමින් ශ්‍රී ලංකාව චීනයේදී ජාත්‍යන්තර මට්ටමේ සූපවේදී තරගයක් ජයග්‍රහණය කළේ වසර 15කට පසුව වීම විශේෂත්වයක්.