BMICH හි තිබු ප්‍රදර්ශනයකදී වාහන විකුණා දෙනවැයි පවසා කෝටි හතරකට අධික මුදලක් වංචා කළ සැකකරු රිමාන්ඩ්

බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පවත්වන ලද ප්‍රදර්ශනයකදී විකණීමටට තිබෙන වාහන විකුණා දෙන බව පවසා කෝටි හතරකට අධික මුදලක් වංචා කළ බව කියන සිද්ධියට අදාලව අත්අඩංගුවට ගත් සැකකරුවෙක් ලබන 16 දක්වා රක්ෂිත බන්ධනාගාර ගත කරන ලෙස කොළඹ ප්‍රධාන මහේස්ත්‍රාත් අසංග එස්. බෝදරගම අද(2) නියෝග කළා.

සිද්ධියට අදාල නඩුව කැඳවූ අවස්ථාවේදී අපරාධ පරීක්‍ෂණ දෙපාර්තමේන්තුව විසින් කරන ලද කරුණු සලකා බැලීමෙන් අනතුරුව මෙලෙස නියෝග කරනු ලැබුවා.

මෙම සැකකරු මෙලෙසම ජාවාරම් කරන ලද වාහන සම්බන්ධයෙන් නඩුවක් හෝමාගම අධිකරණයද පවතින බව විමර්ශන නිලධාරීන් අධිකරණයට දන්වා සිටියා.

සිද්ධියට අදාලව වැඩිදුරටත් කරුණු දක්වමින් අපරාධ පරීක්ෂණ දෙපාර්තමේන්තුව සඳහන් කර සිටියේ මෙම සැකකරු ව්‍යාජ නමක් භාවිතා කරමින් බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී පැවැත්වෙන ප්‍රදර්ශනවලදී විකුණා ගැනීමට නොහැකි වාහන විකුණා දෙන බව පවසා මෙලෙස මුදල් වංචා කර ඇති බවයි.

සිද්ධියට අදාල සැකකරු එම අනුස්මරණ ශාලාව තුළ පවතින ප්‍රදර්ශනාගාරයේ ප්‍රදර්ශන කුටි දෙකක් පවත්වාගෙන යමින් වාහන මිලදී ගැනීමට පැමිණෙන පුද්ගලයා සහ වාහනය විකුණන පුද්ගලයාද මුණ ගැස්වීමට සලස්වා මෙම ජාවාරම සිදු කරන බවයි අපරාධ පරීක්ෂණ දෙපාර්තමේන්තුව අධිකරණයට දන්වා සිටියේ.

සිද්ධිය සම්බන්ධයෙන් වැඩිදුරටත් විමර්ශන කටයුතු පවත්වන බැවින් සැකකරුට ඇප ලබා නොදෙන ලෙස අපරාධ පරීක්ෂණ දෙපාර්තමේන්තුව අධිකරණයෙන් ඉල්ලා සිටියා.

ඉදිරිපත් වූ කරුණු සලකා බැලූ මහේස්ත්‍රාත්වරයා සැකකරු ලබන 16 දක්වා රක්ෂිත බන්ධනාගාරගත කිරීමට නියෝග කළා.