හිටපු පොලිස්පති සී. ඩී. වික්‍රමරත්නගේ මරණය ගැන විමර්ශන කටයුතු බස්නාහිර පළාත දකුණ දිසා අපරාධ කොට්ඨාසයට

හිටපු පොලිස්පති සී. ඩී. වික්‍රමරත්නගේ මරණය සම්බන්ධ විමර්ශන කටයුතුබස්නාහිර පළාත දකුණ දිසා අපරාධ කොට්ඨාසයට භාර දී ඇති බව පොලිසිය සඳහන් කරනවා.

මාලඹේ, තලාහේන පරාක්‍රම මාවතේ පිහිටි සිය නිවසේදී අද උදෑසන වෙඩි තබාගෙන ඔහු මිය ගොස් සිටි අතර, මෙම මරණය සියදිවි හානි කරගැනීමක් බවට සැක කෙරෙන බවයි පොලිස් මාධ්‍ය ප්‍රකාශකවරයා කියා සිටියේ.

63 හැවිරිදි හිටපු පොලිස්පති සී.ඩී. වික්‍රමරත්න දෙදරු පියෙකු වන අතර, වෙඩි තැබීම සිදුවන අවස්ථාවේ ඔහුගේ පවුලේ සාමාජිකයින් ද නිවසේ සිට තිබෙනවා.

සිය ආරක්ෂක නිලධාරියෙකු සතුව තිබූ පිස්තෝල අවියෙන් වෙඩි තැබීම සිදු කරගෙන ඇති බවටයි තොරතුරු වාර්තා වුණේ.

පෞද්ගලික හේතුවක් මත එලෙස සියදිවි හානි කර ගැනීම සිදු කරගෙන ඇති බවට පොලිසිය සැක කරනවා.

සිද්ධියෙන් පසු හිටපු පොලිස්පති සී.ඩී. වික්‍රමරත්න කඩිනමින් නැගෙනහිර කොළඹ මූලික රෝහල වෙත යොමු කෙරුණ ද ඒ වන විටත් ඔහු මියගොස් සිටියා.