අගෝස්තු 5 පාකිස්තානය පුරා දැවැන්ත විරෝධතා ‍රැල්ලක්

පාකිස්තාන ටෙහ්රීක්-ඊ-ඉන්සාෆ් (PTI) පක්ෂයේ නිර්මාතෘ සහ හිටපු අග්‍රාමාත්‍ය ඉම්රාන් ඛාන් 2023 වසරේදී අත්අඩංගුවට ගනු ලැබූ දිනය සනිටුහන් කරමින්, එළඹෙන අගෝස්තු 5 වැනිදා රට පුරා දැවැන්ත විරෝධතා රැලි පැවැත්වීමට එම පක්ෂය තීරණය කර ඇති බව පාකිස්තාන ජනමාධ්‍ය වාර්තා කරනවා.

PTI පක්ෂයේ වත්මන් සභාපති ගෝහර් අලි ඛාන් විසින් පසුගිය බදාදා පැවැති විශේෂ සාකච්ඡාවකින් අනතුරුව මාධ්‍ය හමුවක් පවත්වමින් මේ බව නිල වශයෙන් ප්‍රකාශ කර තිබෙනවා.

"අපගේ සාකච්ඡාවට එක් නිශ්චිත න්‍යාය පත්‍රයක් තිබුණත්, එහිදී සමස්ත රටේ පවතින දේශපාලන තත්ත්වය පිළිබඳව දීර්ඝ වශයෙන් අවධානය යොමු කෙරුණා," යනුවෙනුයි ඔහු එහිදී සඳහන් කළේ.

රාජ්‍ය ත්‍යාග නීතිවිරෝධී ලෙස අලෙවි කිරීමේ චෝදනාව මත අධිකරණය විසින් වසර තුනක සිරදඬුවමක් නියම කිරීමෙන් අනතුරුව, 2023 අගෝස්තු 5 වැනිදා ඉම්රාන් ඛාන්ව අත්අඩංගුවට ගෙන තිබෙනවා.

පක්ෂයේ පාර්ලිමේන්තු කණ්ඩායම ඒකමතිකව තීරණය කර ඇත්තේ එම දිනට වසරක් පිරීම නිමිත්තෙන් මෙම දීපව්‍යාප්ත විරෝධතා සංවිධානය කිරීමටයි.

"අපගේ පක්ෂයේ සෑම පාර්ලිමේන්තු මන්ත්‍රීවරයෙකුම විශ්වාස කරන්නේ පක්ෂ නිර්මාතෘවරයා සිරගත කිරීම සම්පූර්ණයෙන්ම අසාධාරණ බවයි," යනුවෙන් පැවසූ ගෝහර්, මේ සම්බන්ධයෙන් තමන් අධිකරණය හමුවට ගොස් ඇති නමුත් අභියාචනා පිළිබඳ තීන්දු තවමත් ප්‍රකාශයට පත් කර නොමැති බවද පෙන්වා දුන්නා.

පක්ෂ සභාපතිවරයාට අනුව, PTI දේශපාලන කමිටුව සහ විපක්ෂ සන්ධානය එක්ව ඉදිරි දේශපාලන ක්‍රියාමාර්ග පිළිබඳව ඒකාබද්ධ ප්‍රකාශයක් නිකුත් කිරීමට නියමිතයි.

සැලසුම් කර ඇති විරෝධතාවල ස්වභාවය පිළිබඳව අදහස් දක්වමින් ඔහු කියා සිටියේ මෙවර පැවැත්වෙන විරෝධතා පෙරට වඩා සම්පූර්ණයෙන්ම වෙනස් මුහුණුවරක් ගන්නා බවයි.

පක්ෂ සභාපතිවරයාගේ මෙම නිවේදනය නිකුත් වූයේ ඉම්රාන් ඛාන්ගේ සහෝදරිය වන අලීමා ඛාන් විසින් ඔහුව නිදහස් කර ගැනීම සඳහා දරන උත්සාහයන් තීව්‍ර කරන ලෙස පක්ෂ ක්‍රියාකාරීන්ගෙන් ඉල්ලා සිටීමෙන් අනතුරුව බව පාකිස්තාන මාධ්‍ය වාර්තාවල වැඩිදුරටත් සඳහන් වේ.

පසුගිය දා පැවැති පක්ෂ හමුවකදී අදහස් දක්වමින් ඇය කියා සිටියේ, PTI පක්ෂයට සාධාරණත්වය සහ වගවීම ඉල්ලා වීදි බැසීමට සුදුසුම කාලය එළඹ ඇති බවයි.