වයස අවුරුදු 15ට අඩු දරුවන්ට සමාජ මාධ්‍ය තහනම් - ප්‍රංශ පාර්ලිමේන්තුවේ අනුමැතිය ලැබෙයි

ප්‍රංශයේ වයස අවුරුදු 15ට අඩු ළමයින් සඳහා සමාජ මාධ්‍ය භාවිතය තහනම් කිරීමේ පනත් කෙටුම්පතකට ප්‍රංශ පාර්ලිමේන්තුවේ විශේෂ සංහිඳියා කමිටුව විසින් අනුමැතිය ලබා දී තිබෙනවා.

ප්‍රංශ ජනාධිපති එමානුවෙල් මැක්‍රොන් ප්‍රකාශ කර ඇත්තේ ලබන සැප්තැම්බර් මාසයේ නව පාසල් වාරය ආරම්භ වීමට පෙර මෙම තහනම සක්‍රියව ක්‍රියාත්මක කිරීමට තමන් අපේක්ෂා කරන බවයි.

මෙම කෙටුම්පතට අනුව වයස අවුරුදු 15ට අඩු ළමුන් සඳහා තහනම් කෙරෙන සමාජ මාධ්‍ය ජාල ලැයිස්තුව ප්‍රංශ තොරතුරු තාක්ෂණ අමාත්‍යවරයා විසින් ප්‍රකාශයට පත් කිරීමට නියමිතයි.

මීට අමතරව, සමාජ මාධ්‍ය සමාගම් විසින් ප්‍රංශයේ පෞද්ගලිකත්ව නියාමන ආයතනය මගින් අනුමත කරන ලද පාරිභෝගිකයින්ගේ වයස තහවුරු කිරීමේ විශේෂ පද්ධති ස්ථාපිත කළ යුතු වෙනවා.

එමෙන්ම උසස් පාසල් තුළ ස්මාර්ට් ජංගම දුරකථන භාවිතය සම්පූර්ණයෙන් තහනම් කිරීමට ද මෙම නව පනත් කෙටුම්පත මගින් යෝජනා කර තිබෙනවා.

කමිටු අනුමැතිය හිමි වූ මෙම නීති කෙටුම්පත පාර්ලිමේන්තුවේ පහළ මන්ත්‍රී මණ්ඩලයේ සහ සෙනෙට් සභාවේ අවසන් සම්මත කරගැනීම සඳහා ඉදිරිපත් කිරීමට නියමිතයි.

පසුගිය දෙසැම්බර් මාසයේදී ඕස්ට්‍රේලියාව විසින් වයස අවුරුදු 16ට අඩු දරුවන්ට ෆේස්බුක්, ටික්ටොක්, ස්නැප්චැට් සහ යූටියුබ් ඇතුළු සමාජ මාධ්‍ය තහනම් කරමින් ලොව ප්‍රථම වරට මෙවැනි නීතියක් පැනවූ අතර, ප්‍රංශය ද එම පියවර අනුගමනය කරමින් සිටී. ප්‍රංශ ජනාධිපති මැක්‍රොන් යුරෝපා සංගමය තුළ ද මෙවැනි සීමා පැනවීම් සඳහා සහයෝගය ලබා ගැනීමට කටයුතු කර ඇති අතර, යුරෝපීය කොමිසමේ සභාපතිනි උර්සුලා වොන් ඩර් ලේයන් ද ළමුන්ගේ සමාජ මාධ්‍ය භාවිතය සීමා කිරීමට සහය පළ කර තිබෙනවා.