විපක්ෂ නායක සජිත් සහ එක්සත් ජනපද නියෝජිත මන්ත්‍රී මණ්ඩල දූත පිරිසක් හමුවෙයි

විපක්ෂ නායක සජිත් ප්‍රේමදාස සහ ප්‍රජාතන්ත්‍රවාදී පක්ෂයේ සාමාජික, එක්සත් ජනපද නියෝජිත මන්ත්‍රී මණ්ඩලයේ සාමාජික සහ මන්ත්‍රී මණ්ඩල බුද්ධි කමිටුවේ සාමාජික (Member of the Democratic Party, member of the House of Representatives and member of the house intelligence committee) ක්‍රිසි හවුලාහන් සහ ඇයගේ දූත පිරිස කොළඹ පිහිටි විපක්ෂ නායක කාර්යාලයේදී හමුව තිබෙනවා.

මෙම හමුවේ දී ආර්ථික සහයෝගීතාව, පාලනය, අධ්‍යාපනය සහ කලාපීය ස්ථාවරත්වය කෙරෙහි විශේෂ අවධානයක් යොමු කරමින් ශ්‍රී ලංකාව සහ අමෙරිකා එක්සත් ජනපදය අතර ද්විපාර්ශ්වික සබඳතා තවදුරටත් ශක්තිමත් කිරීම කෙරෙහි දෙපාර්ශ්වය අතර සාකච්ඡා පැවැත්වුණා.

ශ්‍රී ලංකාවේ ආර්ථික ප්‍රකෘතියට සහ දිගුකාලීන සංවර්ධනයට සහාය වීම සඳහා අඛණ්ඩ සහයෝගීතාවයේ වැදගත්කම මෙහි දී විපක්ෂ නායකවරයා අමෙරිකානු එක්සත් ජනපද දූත පිරිස හමුවේ අවධාරණය කර තිබෙනවා.

දෙරට අතර දිගුකාලීන හවුල්කාරිත්වය පිළිබිඹු කරමින් පසුගිය කාලයේ අමෙරිකා එක්සත් ජනපදය ශ්‍රී ලංකාවට ලබා දුන් අඛණ්ඩ සහයෝගය සම්බන්ධයෙන් විපක්ෂ නායක සජිත් ප්‍රේමදාස සිය කෘතඥතාව පළ කළා.

එසේම දිවංගත ජනාධිපති රණසිංහ ප්‍රේමදාසගේ පාලන සමයේ දී ලබා දුන් කෝටා ප්‍රවේශය ශ්‍රී ලංකාවේ ඇඟලුම් කර්මාන්තය පුළුල් කිරීමට, රැකියා උත්පාදනය කිරීමට සහ අපනයන ආදායම් වැඩි කිරීමට සැලකිය යුතු ලෙස දායක වූ බව සඳහන් කරමින් ඔහු ඇඟලුම් අංශය ගැන විශේෂයෙන් මෙහි දී සඳහන් කර තිබෙනවා.

ශ්‍රී ලංකාවේ ඇඟලුම් අංශයේ සංවර්ධනයට සහාය වීමේ දී එක්සත් ජනපදය ඉටු කළ වැදගත් කාර්යභාරයට ඔහු මෙහි දී සිය කෘතඥතාව පළ කළා.

ගුවන් හමුදා ප්‍රවීණයෙකු සහ ප්‍රජාතන්ත්‍රවාදී පක්ෂයේ සාමාජික, නියෝජිත මන්ත්‍රී මණ්ඩලයේ සාමාජික සහ මන්ත්‍රී මණ්ඩල බුද්ධි කමිටුවේ (Member of the Democratic Party, member of the House of Representatives and member of the house intelligence committee) සාමාජිකාවක් වන එක්සත් ජනපද නියෝජිත ක්‍රිසි හවුලාහන් ප්‍රජාතන්ත්‍රවාදී වටිනාකම්, ආර්ථික ස්ථාවරත්වය සහ ශ්‍රී ලංකාව සමග අඛණ්ඩ සම්බන්ධතාව සඳහා එක්සත් ජනපදයේ කැපවීම නැවත වරක් මෙහි දී තහවුරු කර තිබෙනවා.

ප්‍රජාතන්ත්‍රවාදී ආයතන ශක්තිමත් කිරීම, විනිවිදභාවය සහ වගවීම ප්‍රවර්ධනය කිරීම, අධ්‍යාපනයට ප්‍රවේශය පුළුල් කිරීම සහ ශ්‍රී ලංකාවේ ජනතාවට තිරසාර ආර්ථික අවස්ථා නිර්මාණය කිරීම ඇතුළු සැවොම බෙදා ගත් ප්‍රමුඛතා පිළිබඳව ද දෙපාර්ශ්වය මෙහි දී අදහස් රැසක් හුවමාරු කරගෙන තිබුණා.