චීනයට අමෙරිකාවෙන් යළි රතු එළියක්

චීනය විසින් ඉරානයට ආයුධ සැපයුවහොත් තමා "කණගාටුවට" පත්වන බව අමෙරිකානු ජනාධිපති ඩොනල්ඩ් ට්‍රම්ප් ප්‍රකාශ කර ඇති අතර, ටෙහෙරානයට ආයුධ අලෙවි නොකරන බවට චීන ජනාධිපති ෂී ජින්පින් තමාට පෞද්ගලිකව ලබා දුන් සහතිකය නැවතත් අවධාරණය කර තිබෙනවා.

ඕවල් කාර්යාලයේ පැවැති මාධ්‍ය හමුවකදී අදහස් දක්වමින් ට්‍රම්ප් මේ බව සඳහන් කළේ, සති කිහිපයක් ඇතුළත චීනයේ නිෂ්පාදිත කරමත තබාගෙන විදිය හැකි මිසයිල (shoulder-fired missiles) 400 ක් දක්වා වූ තොගයක් ඉරානය වෙත ලැබීමට නියමිත බවට ජාත්‍යන්තර මාධ්‍ය වාර්තා කිරීමත් සමගින්.

"එහෙම වුණොත් ඒක හරිම පුදුමසහගත දෙයක් වේවි," යනුවෙන් ඕවල් කාර්යාලයේ සිටි මාධ්‍යවේදීන් හමුවේ ට්‍රම්ප් පවසා ඇති බවයි විදෙස් මාධ්‍ය වාර්තා කරන්නේ.

"මම අදහස් කළේ, ඔය වගේ දේවල් වෙන්න පුළුවන්, ඒත් ඒක ඇත්තටම පුදුම හිතෙන දෙයක් වේවි. ඔහු (ෂී ජින්පින්) මේකට සම්බන්ධ වෙන්නේ නැහැ කියලා මට ඉතාම ස්ථිරවම කිව්වා. ඔහු එහෙම කළොත් මම දැඩි ලෙස කණගාටුවට පත්වන බව ඔහු හොඳින්ම දන්නවා," යනුවෙන් අමෙරිකානු ජනාධිපතිවරයා වැඩිදුරටත් අදහස් දක්වා තිබෙනවා.

විදේශීය පාර්ශ්වයන්ගේ සහාය ඇතිව සිය නිශ්චිත සන්නද්ධ ශක්තිය නැවත බලගැන්වීමට ඉරානය සක්‍රීයව උත්සාහ කරන මෙවන් මොහොතක, චීනය විසින් ඉරානයට නව ගුවන් ආරක්ෂණ පද්ධති ලබා දීමට සූදානම් වන බවට CNN පුවත් සේවය වාර්තා කළ බුද්ධි තොරතුරු ඇගයීම්වලින් පසුව මෙම තත්ත්වය මතුව තිබෙනවා.

ටෙහෙරානයට ආයුධ සැපයීමට එරෙහිව අමෙරිකානු ජනාධිපතිවරයා පසුගිය සතියේදී චීනයට සහ රුසියාවට අනතුරු ඇඟවීම් නිකුත් කර තිබුණා.