ඩෙල්ෆ් දූපත සංචාරක කේන්ද්‍රස්ථානයක් කිරීමට පියවර

උතුරු පළාතේ සංචාරක ස්ථාන සංවර්ධනය කරමින් සංචාරක පැමිණීම වේගවත් කිරීමට විශේෂ වැඩපිළිවෙළක් ආරම්භ කර තිබෙනවා.

ඒ අනුව ඕලන්ද යුගයේ ස්මාරක සහ නිදහසේ සැරිසරන අශ්වයන් සහිත ඩෙල්ෆ් දූපත තිරසාර සංචාරක ගමනාන්තයක් ලෙස සංවර්ධනය කිරීමට නියමිතයි.

ඊට අදාලව යාපනය දිස්ත්‍රික්කය මූලික කරගනිමින් විශේෂ නිරීක්ෂණ චාරිකාවක් සහ රාජ්‍ය මට්ටමේ ඉහළ නිලධාරීන්ගේ හමුවක් සඳහා සංචාරක නියෝජ්‍ය අමාත්‍ය මහාචාර්ය රුවන් රණසිංහ එක්වුණා.

මෙම සංවර්ධන කටයුතු ඉදිරි අයවැය මඟින් සහ ශ්‍රී ලංකා සංචාරක සංවර්ධන අධිකාරිය (SLTDA) හරහා මූල්‍ය ප්‍රතිපාදන ලබාගෙන ඉදිරියට කරගෙන යාමට සැලසුම් කර තිබෙනවා.

එමඟින් ඩෙල්ෆ් දූපතේ පානීය ජලය, මහාමාර්ග සහ ගමනාගමන පහසුකම් වැඩිදියුණු කිරීමට මෙන්ම ප්‍රදේශවාසීන්ගේ සංචාරක සත්කාරක දැනුම ඉහළ නැංවීමට ද අපේක්ෂිතයි.

මෙම නිරීක්ෂණ චාරිකාව සඳහා යාපනය දිස්ත්‍රික් පාර්ලිමේන්තු මන්ත්‍රීවරුන් වන ඉලංකුමාරන් කරුණානාදන්, වෛද්‍ය ශ්‍රී භවනදරාජා ෂන්මුගනාදන් සහ රාජීවන් ජෙයචන්ද්‍රමූර්ති එක්ව සිටියා.

ඊට අමතරව ශ්‍රී ලංකා සංචාරක සංවර්ධන අධිකාරිය (SLTDA), ශ්‍රී ලංකා සංචාරක ප්‍රවර්ධන කාර්යාංශය (SLTPB), ඩෙල්ෆ් ප්‍රාදේශීය ලේකම්වරයා, ප්‍රාදේශීය දේශපාලන අධිකාරිය, රාජ්‍ය නිලධාරීන්, ප්‍රදේශවාසීන් මෙන්ම ශ්‍රී ලංකා නාවික හමුදාවේ සහ ශ්‍රී ලංකා පොලීසියේ නිලධාරීන් ද සහභාගී වුණා.