හොරණ කළුගඟේ නීතිවිරෝධීව මැණික් ගැරූ 25 දෙනාට ඇප

%E0%B7%84%E0%B7%9C%E0%B6%BB%E0%B6%AB+%E0%B6%9A%E0%B7%85%E0%B7%94%E0%B6%9C%E0%B6%9F%E0%B7%9A+%E0%B6%B1%E0%B7%93%E0%B6%AD%E0%B7%92%E0%B7%80%E0%B7%92%E0%B6%BB%E0%B7%9D%E0%B6%B0%E0%B7%93%E0%B7%80+%E0%B6%B8%E0%B7%90%E0%B6%AB%E0%B7%92%E0%B6%9A%E0%B7%8A+%E0%B6%9C%E0%B7%90%E0%B6%BB%E0%B7%96+25+%E0%B6%AF%E0%B7%99%E0%B6%B1%E0%B7%8F%E0%B6%A7+%E0%B6%87%E0%B6%B4

හොරණ, වගවත්ත ප්‍රදේශයේ කළුගඟේ නීතිවිරෝධී අයුරින් මැණික් ගැරීමේ සිද්ධියට අදාලව රිමාන්ඩ් භාරයේ සිටි සැකකරුවන් 25 දෙනා එක් අයෙකුට රුපියල් ලක්ෂ පහ බැගින් වූ ශරීර ඇප මත මුදා හරින ලෙස හොරණ මහේස්ත්‍රාත් ලක්මිණි විදානගමගේ (03) දින නියෝග කළා.

මෙසේ ඇප නියම වූයේ හොරණ, වගවත්ත, කිරිඇල්ල ආදි විවිධ ප්‍රදේශවල පදිංචි අවුරුදු 19 ත් 35 ත් අතර වයස් කාණ්ඩවල පසුවන්නන්.

මෙම පිරිස දින 05 ක කාලයක් රිමාන්ඩ් භාරයේ සිටියා.

මෙම නඩුවේදී විත්ති පාර්ශ්වය වෙනුවෙන් පෙනී සිටි නීතිඥ රොෂාන් දෙහිවල අධිකරණයට කරුණු දක්වමින්, මෙම වරද කිසිසේත්ම පොදු දේපළ පනත යටතට නොවැටෙන බවත්, එසේ සැලකේ නම් අධිවේගී මාර්ගයේ සිදුවන අනතුරක් සම්බන්ධයෙන් වුවත් පොදු දේපළ පනත යටතට වැටෙන බවත් පෙන්වා දුන්නා.

මෙහිදී අධිකරණයට කරුණු දැක්වූ විමර්ශන නිලධාරීන් පෙන්වා දුන්නේ මහ දවාලේ මෙම පිරිස යන්ත්‍ර සූත්‍ර යොදා ගනිමින් දීර්ඝ කාලයක් තිස්සේ මෙම ක්‍රියාව සිදුකර විශාල පරිසර හානියක් සිදුකර ඇති බවයි.

බෝට්ටු 14 ක් සහ මෝටර් 06 ක් ඇතුළු මැණික් ගැරුම් උපකරණ රාශියක් අත්අඩංගුවට ගත් බවත්, බලවතුන්ගේ ආශීර්වාද ලබා ගනිමින් කිසිදු බියකින් තොරව මෙම නීතිවිරෝධී ක්‍රියාව සිදු කර ඇති බවත් ඔවුන් පෙන්වා දුන්නා.

නලින් ඉඹුලගොඩ, උත්පල අතුකෝරල, තනූ කළුබෝවිල යන නීතිඥවරුද සැකකරුවන් වෙනුවෙන් අධිකරණයේදී කරුණු ඉදිරිපත් කළා.

පානදුර වලාන මධ්‍යම දූෂණ මර්දන ප්‍රහාරක බලකායේ ස්ථානාධිපති ප්‍රධාන පොලිස් පරීක්ෂක ඉන්දික වීරසිංහගේ මෙහෙයවීමෙන් ප්‍රධාන පොලිස් පරීක්ෂක අජිත් ශාන්ත සහ නිශ්ශංක ඇතුළු නිලධාරීන් විසින් මෙම වැටලීම සිදු කර තිබුණා.