ලේ පරීක්ෂණවලට වැඩිපුර මුදල් අය කළ කෑගල්ල පෞද්ගලික රෝහලකට දඩ

කල් ඉකුත් වූ රසායනික ද්‍රව්‍ය, උපකරණ භාවිත කිරීම සහ ලේ පරීක්ෂණවලට වැඩිපුර මුදල් අය කිරීම සම්බන්ධයෙන් කෑගල්ල පෞද්ගලික රෝහලකට රුපියල් 520,000/- ක දඩයක් කෑගල්ල මහෙස්ත්‍රාත් අධිකරණය විසින් නියම කළා.

ඒ පාරිභෝගික කටයුතු පිළිබඳ අධිකාරීය විසින් අධිකරණයට කරන ලද කරුණු දැක්වීමෙන් අනතුරුවයි.

පාරිභෝගික කටයුතු පිළිබඳ අධිකාරී පනතේ නීතිරීති සහ විධානයන් උල්ලංඝනය කරමින් කටයුතු කළ කෑගල්ල, කොළඹ පාරේ පිහිටි පෞද්ගලික රෝහලට එරෙහිව පාරිභෝගික කටයුතු පිළිබඳ අධිකාරියේ කෑගල්ල දිස්ත්‍රික් විමර්ශන නිලධාරීන් විසින් කෑගල්ල මහෙස්ත්‍රාත් අධිකරණය හමුවේ චෝදනා 03ක් යටතේ නඩු පවරා තිබෙන බවයි විමර්ශන නිලධාරීන් අධිකරණයට දන්වා සිටියේ.

රුධිර පරීක්ෂණයක් සඳහා පාරිභෝගික අධිකාරිය පනවා ඇති රු. 400/- ක පාලන මිල ඉක්මවා රු. 500/- ක මුදලක් අය කිරීම, කල් ඉකුත් වූ රසායනික ද්‍රව්‍ය ළඟ තබා ගැනීම, රෝහල් රසායනාගාරය තුළ කල් ඉකුත් වූ HCV Rapid Test Cassettes ඇසුරුම් 20ක් සහ Clinical System Analyzers සඳහා වන කල් ඉකුත් වූ රසායනික ද්‍රව්‍ය (System Cleaning Solution & Acid Solution) ගබඩා කර තිබීම සහ
කල් ඉකුත් වූ එන්නත් කටු (Needles) විකිණීමට තැබීම යන චෝදනා තුනට නඩු ගොනු කර තිබුණා.

පාරිභෝගික අධිකාරියේ නිලධාරීන් විසින් 2026.07.24 වන දින සිදුකළ විශේෂ වැටලීමකදී මෙම ක්‍රියාකාරකම් අනාවරණය කරගෙන තිබුණා

අධිකරණය හමුවේ නඩුව කැඳවූ අවස්ථාවේදී, එල්ල වූ චෝදනා 03ටම විත්තිකාර රෝහල් ආයතනය වරද පිළිගත් අතර, එහිදී ගරු අධිකරණය විසින් රුපියල් 520,000/- ක දඩ මුදලක් නියම කිරීමට පියවර ගනු ලැබුවා.

මහජනතාවගේ සෞඛ්‍යයට හානියක් වන පරිදි කල් ඉකුත් වූ ඖෂධ හෝ රසායනික ද්‍රව්‍ය හා උපකරණ භාවිත කරන, පාලන මිල ඉක්මවා ගාස්තු අය කරන පෞද්ගලික රෝහල් සහ රසායනාගාර පිළිබඳව කාර්යාල වේලාවන් තුළ 1977 කෙටි ඇමතුම් අංකය ඔස්සේ වහාම පාරිභෝගික අධිකාරිය වෙත දැනුම් දෙන ලෙස දන්වා සිටියා.