විදුලි උත්පාදනය සඳහා සහනදායී ඉන්ධන ගාස්තුවක් - EGL සමාගමට රුපියල් 25ක ඉන්ධන සහනයක්

විදුලි උත්පාදන ලංකා (EGL) පෞද්ගලික සමාගම වෙත දැනට පවතින වෙළඳපල මිලට වඩා රුපියල් 25 ක් අඩු සහනදායී මිලකට විදුලි උත්පාදනය සඳහා ඉන්ධන ලබා දෙන බව බලශක්ති අමාත්‍ය අනුර කරුණාතිලක පවසනවා.

ඉංග්‍රීසි පුවත්පතකට ඊයේ (10) අදහස් දක්වමින් අමාත්‍යවරයා කියා සිටියේ, මෙම වැඩපිළිවෙළ මීට පෙරද පැවති එකක් බවත්, EGL සමාගම වෙත සහනදායී පදනමක් යටතේ ඉන්ධන සැපයීම තවදුරටත් කරගෙන යාම සඳහා එම යාන්ත්‍රණය නැවත ක්‍රියාත්මක කළ බවයි.

"ලංකා ඛනිජ තෙල් නීතිගත සංස්ථාව දැනට පවතින මිලට වඩා රුපියල් 25 ක් අඩුවෙන් ඉන්ධන ලබා දෙනවා. ඒක මීට කලිනුත් තිබුණු ක්‍රමවේදයක්. අපි ඒ ගැන වැඩිදුරටත් සාකච්ඡා කරලා ඒ යාන්ත්‍රණය නැවත ස්ථාපිත කළා," යනුවෙනුයි අමාත්‍යවරයා මෙහිදී පවසා සිටියේ.

විදුලි පාරිභෝගිකයින්ගේ සංගමයේ ප්‍රධාන ලේකම් සංජීව ධම්මික පවසන්නේ, නවතම විදුලි ගාස්තු සංශෝධනයට ඇතුළත් කර ඇති එක් කොන්දේසියක් වන්නේ EGL සමාගම CPC සමඟ ඉන්ධන මිලදී ගැනීමේ ගිවිසුම්වලට එළඹීම බවයි.

තවද, EGL සමාගමට ගිවිසුම සම්පූර්ණ කිරීම සඳහා ලබා දී තිබූ කාලය දැනටමත් අවසන් වී ඇති බව මහජන උපයෝගිතා කොමිෂන් සභාව තහවුරු කර ඇති බවයි ඔහු පවසා සිටියේ.

EGL සහ CPC අතර සාකච්ඡා තවදුරටත් පවතින බව මීට පෙර වාර්තා වූ අතර, ඉන්ධන මිලට ඇතුළත් කර ඇති 'බෙදාහැරීමේ නිලධාරීන්ගේ කොමිස් මුදල' සම්බන්ධයෙන් දෙපාර්ශ්වය අතර මතභේදාත්මක තත්ත්වයක් පැවතුණා.

විදුලි උත්පාදනය සඳහා මිලදී ගන්නා ඉන්ධන වෙනුවෙන් අදාළ කොමිස් මුදල ඉවත් කරන ලෙස EGL සමාගම ඉල්ලා සිටියද, EGL යනු සෘජු ඉන්ධන පාරිභෝගිකයෙකු ලෙස ක්‍රියා කරන බැවින් එවැනි සහනයක් ලබා දිය නොහැකි බවයි පවසා සිටියේ.