හිටපු අමාත්‍ය රාජිත සේනාරත්නගේ සොහොයුරු මහිල් සේනාරත්න අල්ලස් කොමිසමෙන් අත්අඩංගුවට

ලංකා ධීවර සංස්ථාවේ 2010 - 2012 කාලසීමාව තුළ දිවයින පුරා මසුන් අලෙවි සැල් ඉදිකිරීමේ සහ අලුත්වැඩියා කිරීමේදී නියමිත ප්‍රසම්පාදන ක්‍රියාවලිය අනුගමනය නොකර, සෘජුවම තෝරාගත් ආයතන දෙකක් වෙත එම කටයුතු සඳහා අනුමැතිය ලබාදීමේ චෝදනාව මත ධීවර සංස්ථාවේ හිටපු සභාපතිවරයෙකු වූ හේවා හැලඹගේ මහීල් ප්‍රියදර්ශී සේනාරත්න අල්ලස් හෝ දූෂණ චෝදනා විමර්ශන කොමිෂන් සභාව විසින් අද (18) අත්අඩංගුවට ගනු ලැබ තිබෙනවා.

අල්ලස් කොමිසම සඳහන් කළේ, අදාල ආයතන දෙක වෙත වැඩ කටයුතු පැවරීම සඳහා නිලධාරීන්ට බලපෑම් කර වගවීමට සැලැස්වීම මඟින් දූෂණය නමැති වරදය සිදු කර ඇතැයි යන චෝදනාව මත මෙම අත්අඩංගුවට ගැනීම සිදු කළ බවයි.

ඒ අනුව, අදාල විමර්ශන නිලධාරීන් විසින් සැකකරු මෙලෙස අත්අඩංගුවට ගෙන ඇති අතර, සැකකරු අද (18) කොළඹ ප්‍රධාන මහේස්ත්‍රාත් අධිකරණයට ඉදිරිපත් කිරීමට නියමිතයි.