රේගුවේ මහ පරිමාණ වංචාවක් ගැන ඩී.වී. චානකගෙන් හෙළිදරව්වක්

''මේ ලංකා ඉතිහාසයේ වෙච්ච තවත් වංචාවක් මේක රේගුව ඇතුළේ අර කන්ටේනර 123ට අමතරව වුණු වංචාවක්'' යැයි කියමින් පාර්ලිමේන්තු මන්ත්‍රී ඩී.වී චානක (19) වැනිදා පාර්ලිමේන්තුවේදී අනාවරණයක් සිදුකළා.

මේ සම්බන්ධයෙන් ජනාධිපතිතුමා ප්‍රකාශයක් සිදුකළ යුතු බවත් එම වාර්තාව හංගන්නේ ඇයිදැයි මන්ත්‍රීවරයා එහිදී ප්‍රශන කළා.

වැඩි දුරටත් අදහස් දැක්වූ ඩී.වී චානක මන්ත්‍රීවරයා,

''අඩි 40ක කන්ටේනරයක එනවා වාහන අමතර කොටස්. ෂීට්, එංජින් වගේ අමතර කොටස් රාශියක් එනවා. මේවා එද්දි සාමාන්‍යයෙන් රේගුවේ තිබෙනවා ක්‍රමවේද තුනක්. මේ කන්ටේනරය යන්නේ රෙඩ් චැනල් එකට එතකොට ඒක භෞතිකව වගේම මැෂින් එකෙත් චෙක් කරන්න ඕනේ. මේකේ පළමු භෞතික පරීක්ෂාවට රේගු අධ්‍යක්ෂ ජනරාල් අරුක්ගොඩගෙ උපදෙස් මත කණ්ඩායමක් රේගුවෙන් යවනවා. ඒ අය කියනවා ප්‍රශ්නයක් නෑ කියලා.

නියෝජ්‍ය රේගු අධ්‍යක්ෂ එන්.එස් කුමානායක ප්‍රධානත්වයෙන් දෙවැනි කණ්ඩායම යවනවා. එන්.එස් කුමානායක කියන්නේ එයා ජනාධිපති ළඟ ඉන්න රටේ ප්‍රධානම රාජ්‍ය නිලධාරියා. එයාල පරීක්ෂා කරලා කියනවා ප්‍රශ්නයක් නෑ ඒකේ ආසන හතක් වැඩිපුර තියෙනවා කියලා. ඒ හත රාජසන්තක කරනවා. මේ ගැන නැවත පැමිණිල්ලක් අධ්‍යක්ෂ ජනරාල්ට යනවා මේකේ තවත් දේවල් තියෙනවා කියලා.

ඊට පස්සෙ මේක රේගුවේ මධ්‍යම විමර්ශන අංශයට යොමුකරනවා. ඔවුන් හොයා ගන්නවා මේකේ අයිතම 85ක් තිබෙන බව. එතකොට මේකේ 45ක් ගැන රේගු සටහන් කරනයේ නෑ. මේ 45ට අයත් යුනිට් 355ක් හොරට ඇවිල්ලා. අමතරව ප්‍රකාශ කරපු අයිතම 15 තුළ යුනිට් 254ක් වැඩියෙන් ඇවිල්ලා. ඊට අමතරව සටහන්කරණයේ තිබුණු 7ක් තියෙනවා අඩුවෙන් ටැක්ස් ගෙවන ඒවා ඒක ඇතුළේ නෑ. තව අයිතම 23ක යුනිට් 474ක් අතුරුදන්. මෙතන් තියෙනවා ආනයන බලපත්‍ර නැති වාහන ආසන 122ක්. රිම් සහිත ටයර් 18කුත් තිබිලා.

අවසානයේ මේ පරීක්ෂණ වාර්තාව 2026/01/19 වැනිදා මුදල් අමාත්‍යංශ ලේකම්ට යවනවා. ලේකම් ඉන්නේ ජනාධිපතිගේ දේශපාලන පත්වීමක්. මේ ගැන වාර්තා ජනාධිපතිට දුන්නත් තමන්ගේ හිතවතා ආරක්ෂා කරන්න පරීක්ෂණ වාර්තාව යට ගහනවා. ජනාධිපතිතුමා ඇයි මේ රිපොර්ට් එක හැංගුවේ එතුමා යාළුවා හංගන්නේ ඇයි ජනාධිපති ප්‍රකාශයක් සිදුකළ යුතුයි.''