දුම්කොළ බදු ඉහළ යාමත් සමඟ සිගරට් නිෂ්පාදනය 32%කින් පහළට

දුම්කොළ නිෂ්පාදන මත අඛණ්ඩව බදු ඉහළ නැංවීම හේතුවෙන් 2022 සහ 2025 අතර කාලය තුළ මෙරට සිගරට් නිෂ්පාදනය 32%කින් පහත වැටී ඇති බව ආර්ථික සංවර්ධන නියෝජ්‍ය අමාත්‍ය නිශාන්ත ජයවීර පාර්ලිමේන්තුවේදී ප්‍රකාශ කර සිටියා.

පාර්ලිමේන්තු මන්ත්‍රී දයාසිරි ජයසේකර විසින් මතු කරන ලද ප්‍රශ්නයකට පිළිතුරු දෙමින් නියෝජ්‍ය අමාත්‍යවරයා මෙම අනාවරණය කළා.

රජයේ දුම්කොළ බදු ප්‍රතිපත්තියේ බලපෑම හේතුවෙන් 2022 වසරේදී බිලියන 2.8ක් වූ සිගරට් නිෂ්පාදනය 2025 වසර වන විට බිලියන 1.9 දක්වා අඩුවී ඇති අතර රජයේ ආදායම වැඩි කර ගැනීමට අමතරව, දුම්කොළ භාවිතය නිසා ඇති වන සෞඛ්‍ය පිරිවැය සහ අනෙකුත් සෘණාත්මක සමාජ-ආර්ථික බලපෑම් අවම කර ගැනීම සඳහා මෙම ප්‍රතිපත්තිය හඳුන්වා දුන් බව ඔහු සඳහන් කර සිටියේ.

2023 වසරේ සිට මේ දක්වා සිගරට් මත වන සුරාබදු අවස්ථා හතරකදී ඉහළ නංවා ඇති අතර, වැට් (VAT) බදු සහ ආයතනික ආදායම් බදු අනුපාතද සංශෝධනය කර තිබෙනවා.

ඒ අනුව, 2023 ජනවාරි 1 සහ ජූලි 1 යන දිනවල සුරාබදු 20% බැගින් ඉහළ නංවන ලද අතර, 2024 ජනවාරි 1 වන දින උද්ධමන දර්ශක යාන්ත්‍රණය යටතේ 14%කින් සහ 2025 ජනවාරි 11 වන දින තවත් 5.9%කින් එය වැඩි කර ඇති බව සඳහන්.

මීට අමතරව, 2024 ජනවාරි 1 වන දින සිට වැට් බද්ද 15% සිට 18% දක්වා ඉහළ නංවන ලද අතර, 2025 අප්‍රේල් 1 වන දින සිට ආයතනික ආදායම් බදු අනුපාතය 40% සිට 45% දක්වා වැඩි කරන ලද අතර 2025 ජනවාරි 11 දින සිට ක්‍රියාත්මක වන පරිදි සිගරට් එකක දිග අනුව රුපියල් 26.59 සිට රුපියල් 109.95 දක්වා වූ සුරාබදු ක්‍රමයක් මේ වන විට ක්‍රියාත්මක බවත් වැඩි කරන ලද දුම්කොළ බදු මඟින් මහජන සෞඛ්‍ය ආරක්ෂා කිරීමට මෙන්ම රජයේ ආදායම වර්ධනය කර ගැනීමට දායක වී ඇති බව නියෝජ්‍ය අමාත්‍යවරයා වැඩිදුරටත් පවසා සිටියේ.