නික්ම ගිය මාලිනියගේ 83 වන ජන්ම දිනය අද - අදත් ජාතික ශෝක දිනයක්

ප්‍රවීණ සංගීතවේදීනි ආචාර්ය නන්දා මාලිනියගේ අභාවය හේතුවෙන් අද දිනය ද නම් කර ඇත්තේ ජාතික ශෝක දිනයක් ලෙසටයි.

සමකළ නොහැකි හඬින් රසික සිත් සනසා ජීවන යථාර්ථය ගීතයට මුසුකළ ශ්‍රී ලාංකේය සංගීතයේ රම්‍ය සඳ කිරණ - ආචාර්ය නන්දා මාලිනිය ඊයේ දැයට සමුදුන් අතර, ඇගේ දේහය පිළිබඳ අවසන් කටයුතු බොරැල්ල පොදු සුසාන භූමියේදී සිදු කෙරුණේ සුවහසක් ශ්‍රී ලාංකිකයන්ගේ සෝ සුසුම් මධ්‍යයයේයි.

ආචාර්ය නන්දා මාලිනිය පසුගියදා නාවල පිහිටි සිය නිවසේදී දිවි සැරිය නිමා කළ අතර මිය යන විට 82 වැනි වියේ පසුවු ඇගේ 83 වැනි උපන්දිනය ද අදට යෙදී තිබෙනවා.

ගීතය සමාජ ප්‍රබෝධයේ මෙන්ම මානව හැඟීම්වල ප්‍රබල ප්‍රකාශනයක් බවට සිය නිර්මාණ හරහා සාක්ශාත් කරමින් ජාතියේ යශෝරාව නැංවූ ආචාර්ය නන්දා මාලිනියගේ අවසන් කැමැත්ත වී තිබුණේ සිය අවසන් කටයුතු ඉතා චාම් අයුරින් සිදු කරන ලෙසයි .

ජාතියේ යශෝරාවය, ආචාර්ය නන්දා මාලිනියගේ දේහයට අවසන් ගෞරව දැක්වීමට රසිකයන්ට අමතරව කලාකරුවන් ඇතුළු විශාල පිරිසක් පැමිණ සිටියා.

ලක්මවට සමු දී නික්ම ගිය ද නන්දා මාලනියගේ අවසන් සුසුම් පොද මෙරට ජන හදගැස්ම ලෙස ගීත සාහිත්‍යය හා මුසු වෙමින් සදාකාලිකව නින්නාද වනු ඇති.