ශ්‍රී ලංකාව වටා මුහුදේ උෂ්ණත්වය සෙල්සියස් අංශකයකින් ඉහළට

එල්නිනෝ තත්ත්වය හමුවේ ශ්‍රී ලංකාව වටා මුහුදේ උෂ්ණත්වය තවත් සෙල්සියස් අංශකයකින් ඉහළ ගොස් ඇති බව කාලගුණ විද්‍යා දෙපාර්තමේන්තුව පවසනවා.

මේ හේතුවෙන් දිවා කාලයේ උෂ්ණත්වය මෙන්ම රාත්‍රී කාලයේ උෂ්ණත්වය ද ඉහළ අගයක් ගන්නා බවයි එම දෙපාර්තමේන්තුව සඳහන් කළේ.

මේ අතර නැගෙනහිර සහ උතුරුමැද පළාත්වලට සහ වව්නියාව, මුලතිව් හා මොනරාගල දිස්ත්‍රික්කවල ඇතැම් ප්‍රදේශවලට දිවා කාලයේ දැඩි උණුසුම් තත්ත්වයක් පවතිනවා.

එල්නිනෝ තත්ත්වයත් සමග පළාත් කිහිපයකට බලපා ඇති වියළි කාලගුණය හේතුවෙන් මේ වන විට අක්කර 8,000ක පමණ වගා හානියක් ද සිදුව ඇති බවයි කෘෂිකර්ම හා ගොවිජන රක්ෂණ මණ්ඩලය සඳහන් කළේ.

ඔවුන් පෙන්වා දෙන්නේ මේ හේතුවෙන් ගොවීන් 7,000කට ආසන්න පිරිසක් තම වගාවන් විනාශ වීම නිසා පීඩාවට පත්ව ඇති බවයි.

මෙවන් පසුබිමක ජල කළමනාකරණ ඒකකයේ අධ්‍යක්ෂ ඉංජිනේරු නිලන්ත ධනපාල සඳහන් කළේ, මේ වනවිට එම ඒකකයේ යටතේ පාලනය වන ජලාශවල සියයට 55ක ජල ධාරිතාවක් පවතින බවයි.

කෙසේ වෙතත් ඉදිරි වර්ෂාපතනය පවතින කාලසීමාව තුළදී මහ කන්නයේ වගා කටයුතු ආරම්භ කරන ලෙස ඔහු ගොවීන්ගෙන් ඉල්ලා සිටියා.

වියළි කාළගුණයෙන් අම්පාර, බදුල්ල, මඩකලපුව, මොනරාගල, පොළොන්නරුව, රත්නපුර සහ හම්බන්තොට යන දිස්ත්‍රික්කවල පවුල් 25,628ක පුද්ගලයින් 81,865 දෙනෙකු පීඩාවට පත්ව ඇති බව ආපදා කළමනාකරණ මධ්‍යස්ථානය සඳහන් කළා.