ඉස්ලාමාබාද් රෝහල් ගින්නෙන් බිලිඳුන් මියයාම : මව්පියන් යුක්තිය ඉල්ලයි

පාකිස්ථානයේ ඉස්ලාමාබාද් නුවර පිහිටි ප්‍රධාන රෝහලක මාතෘ වාට්ටුවක ඇති වූ හදිසි ගින්නකින් දින කිහිපයක් වයසැති අලුත උපන් බිලිඳුන් 14 දෙනෙකු පිළිස්සී මියයාම සම්බන්ධයෙන් එම බිළිඳුන්ගේ මව්පියන් බලධාරීන්ට දොස් පවරමින් සිටිනවා.

රෝහලේ හට ගත් මෙම ගින්නත් සමග තම දරුවන් බේරාගැනීමට උපකාර ඉල්ලා හඬා වැටුණද, සහන කණ්ඩායම් පැමිණීමට පැය ගණනාවක් ප්‍රමාද වූ බව ශෝකයට පත් මව්පියන් පවසනවා.

පාකිස්ථාන වෛද්‍ය විද්‍යා ආයතනයේ තෙවැනි මහලේ හදිසියේ ගින්න හටගන්නා අවස්ථාවේදී සිය බිලිඳා එහි සිටි බව පවසන ජවේරියා නැමැති මවක් ප්‍රකාශ කළේ, පැය දෙකක් තිස්සේ තමන් උපකාර ඉල්ලා හඬා වැටුණු නමුත් සහන කණ්ඩායම් පැමිණියේ ප්‍රමාද වී බවයි.

''පොලීසිය පැමිණියේ පැය හතරකට පස්සේ, ඇවිත් කියනවා විමර්ශනය කරන්න ආවා කියලා. මගේ පැටියා ඇතුළු බිලිඳුන් පිළිස්සී මිය යනකම්ම ඔවුන්ව බේරාගන්න කවුරුත් හිටියේ නැහැ," යනුවෙන් ඇය චෝදනා කළා.

ගින්නෙන් සිය දින තුනක් වයසැති දියණිය අහිමි වූ 40 හැවිරිදි කුරම් මහමුද් පවසන්නේ උදෑසන 6.00ට පමණ හටගත් ගින්න නිවීමට බලධාරීන් පැමිණියේ උදෑසන 9.00ට පමණ බවයි.

සහන කණ්ඩායම් එනතෙක් ජනතාව තමන්ට හැකි අයුරින් උපකාර කරගත් බවත්, සිය බිරිඳ නිරුපද්‍රිතව එළියට ගත්තද දියණිය අහිමි වූ බවත්, ඔහු වැලපෙමින් පැවසුවා.

වායු සමීකරණ යන්ත්‍රයක ඇති වූ තාක්ෂණික දෝෂයක් හේතුවෙන් මෙම ගින්න හටගෙන ඇති බවට පාකිස්ථාන බලධාරීන් ප්‍රකාශ කරන අතර, සහන සේවා ප්‍රමාද වූ බවට නැගෙන චෝදනා ඔවුහු ප්‍රතික්ෂේප කරනවා.

කෙසේ වෙතත්, දුමෙන් කළු වී ගිය මුහුණින් සහ දෑතින් යුතුව මාධ්‍ය වෙත අදහස් දැක්වූ ඇසින් දුටු සාක්ෂිකරුවන් කිහිපදෙනෙකුම සඳහන් කළේ හදිසි අනතුරු සේවා පැමිණීමට පැය ගණනාවක් ගතවූ බවයි.

අලුත උපන් දරුවන්ගේ දැඩි සත්කාර ඒකකයට ඇතුළු වීමට වෙනත් මගක් නොමැති වූ විට ඔවුන්ට රෝහලේ වීදුරු ජනේල කඩා දැමීමට පවා සිදු වූ බව ඔවුහු පවසනවා.

තවත් පිරිසක් සඳහන් කළේ ගින්න පැතිර යන අවස්ථාවේදී ඇතැම් දොරවල් වසා අගුළු දමා තිබූ අතර, ආරක්ෂක නිලධාරීන් විසින් ජනතාව පිටතට යාම වැළැක්වූ බවයි.

"ඇතුළත හැම තැනම කළු පැහැති තද දුමෙන් පිරී තිබුණා. රෝගීන් ඇතුළේ සිරවෙලයි හිටියේ. හැකි තරම් පිරිසක් බේරාගන්න මම ඇතුළට ගියත්, බිලිඳුන් සිටි ඒකකයට ළඟා වෙන්න අපිට පුළුවන් වුණේ නැහැ," යනුවෙන් සිද්ධිය ඇසින් දුටු අබ්දුල් ගෆූර් පැවසුවා.