නේපාලයට ඩොලර් මිලියනයක ආධාර ලබා දීමට කැබිනට් අනුමැතිය

ශ්‍රී ලංකා රජය මගින් නේපාල රජය වෙත මානුෂීය ආධාර වශයෙන් අමෙරිකානු ඩොලර් මිලියනයක පරිත්‍යාගයක් සිදු කිරීම සඳහා ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව තිබෙනවා.

ශ්‍රී ලංකාව සහ නේපාලය අතර පවතින දිගුකාලීන මිත්‍ර සබඳතා සහ බරපතල ස්වභාවික ආපදාවකින් සිදුවන විනාශකාරී මානුෂීය හා ආර්ථික ප්‍රතිවිපාක සම්බන්ධයෙන් ශ්‍රී ලංකාවේ අත්දැකීම් සැලකිල්ලට ගෙනයි මෙම තීරණය ගෙන ඇත්තේ.

පසුගියදා උතුරු නේපාලයේ රසුවා දිස්ත්‍රික්කයේ ඇති වූ හදිසි ගංවතුර තත්ත්වය හේතුවෙන් විශාල පිරිසකට ජීවිත අහිමි වී මහා පරිමාණයේ දේපළ හානි සිදුවුණා.

එම ආපදා තත්ත්වයේ බරපතල ස්වභාවය හේතුවෙන් නේපාල රජය සහ ජනතාව මත සැලකිය යුතු මානුෂීය බරක් පැටවී ඇති අතර, අතුරුදන් වූ පුද්ගලයින් සෙවීමේ මෙහෙයුම් කටයුතු අඛණ්ඩව සිදු කෙරෙනවා.