මොස්කව් තෙල් පිරිපහදුවට ඩ්‍රෝන ප්‍රහාරයක්

රුසියාවේ මොස්කව් අගනුවර කපොට්න්යා (Kapotnya) දිස්ත්‍රික්කයේ පිහිටි ප්‍රධාන තෙල් පිරිපහදුව වෙත එල්ල වූ ඩ්‍රෝන ප්‍රහාරයකින් පසු එහි විශාල ගින්නක් හටගෙන ඇති බව විදෙස් මාධ්‍ය වාර්තා කරනවා.

ඊයේ (19) රාත්‍රියේ සහ අද අලුයම මොස්කව් සහ මොස්කව් කලාපය ඉලක්ක කරගනිමින් එල්ල වූ දැවැන්ත ඩ්‍රෝන ප්‍රහාර මාලාවක් අතරතුර මෙම ප්‍රහාරය සිදුව ඇති බවයි එම වාර්තාවේ දැක්වෙන්නේ.

ටෙලිග්‍රෑම් නාලිකා ඔස්සේ සංසරණය වන දර්ශන හා මූලික වාර්තාවලට අනුව, මෙම ප්‍රහාරයෙන් පිරිපහදුවේ ELOU-AVT-6 ලෙස හඳුන්වන ප්‍රධාන තෙල් පිරිපහදු ඒකකයට සෘජු හානි සිදුව ඇති බවයි දැක්වෙන්නේ.

මෙම පිරිපහදුව මගින්, වසරකට තෙල් ටොන් මිලියන 11 ක් පිරිපහදු කිරීමේ හැකියාව පවතින අතර, මොස්කව් නගරයේ ඉන්ධන අවශ්‍යතාවයෙන් 40% ක් පමණ සපයනු ලබන්නේ මෙම පිරිපහදුව මගින්.

මීට අමතරව, එල්ල වූ මෙම දැවැන්ත ඩ්‍රෝන ප්‍රහාර මාලාව හේතුවෙන් මොස්කව් හි සොෆියිනෝ (Sofyino) ලොජිස්ටික්ස් තාක්ෂණික උද්‍යානයේ (Logistics Technopark) ද විශාල ගින්නක් හටගෙන ඇති බවයි එම වාර්තාවේ වැඩිදුරටත් සඳහන්.

මූලාශ්‍රය - ASTRA/ Exilenova+