පාස්කු නඩුවේ තීන්දුව හෙට

2019 වසරේ පාස්කු ඉරිදා එල්ල වූ ත්‍රස්ත ප්‍රහාරය සම්බන්ධයෙන් වන ප්‍රධාන නඩුවේ තීන්දුව කොළඹ ත්‍රිපුද්ගල විශේෂ මහාධිකරණය විසින් හෙට (22) ප්‍රකාශයට පත් කිරීමට නියමිතයි.

නවරත්න මාරසිංහ, සුජීව නිශ්ශංක, රාමනාදන් කන්නන් යන කොළඹ ත්‍රිපුද්ගල විශේෂ මහාධිකරණය විනිසුරුවරුන් ඉදිරියේදී මෙම තීන්දුව ප්‍රකාශයට පත් කරනු ඇති.

සහරාන් හෂීම් ඇතුළු මරාගෙන මැරෙන බෝම්බකරුවන් අටදෙනෙකුට ආධාර අනුබල දීම, කුමන්ත්‍රණය කිරීම ඇතුළු චෝදනා 23,270 ක් යටතේ නවුෆර් මවුලවී ඇතුළු විත්තිකරුවන් 24 දෙනාට එරෙහිව නිතිපතිවරයා විසින් මෙහිදී චෝදනා ගොනු කර තිබෙනවා.

මෙම නඩුවේ අධිකරණය විසින් චූදිතයින්ගේ පාපොච්චාරණ 10ක් සාක්ෂි ලෙස පිළිගෙන ඇති අතර, සඟවා තිබූ පුපුරණ ද්‍රව්‍ය, තියුණු ආයුධ, ගිනි අවි ඇතුළු ද්‍රව්‍ය 2,076 ක් නඩු භාණ්ඩ ලෙස නම් කර ඇති බව අධිකරණය හමුවේ අනාවරණය වුණා.

මෙම ප්‍රහාරයෙන් ශ්‍රී ලංකාවට පැමිණ සිටි සංචාරකයන් හතළිස් දෙනෙකුට ආසන්න පිරිසක්, කුඩා ළමයින් තිස්පස් දෙනෙකුට ආසන්න පිරිසක් ඇතුළු පුද්ගලයන් 274 දෙනකු මරණයට පත්වූ අතර, තවත් 577 දෙනෙකුට තුවාල සිදුවුණා.

මේ අතර හිටපු රාජ්‍ය බුද්ධි ප්‍රධානී විශ්‍රාමික මේජර් ජනරාල් සුරේෂ් සලේ පාස්කු ඉරුදින ත්‍රස්ත ප්‍රහාරයට සම්බන්ධ බවට පාර්ලිමේන්තුව හමුවේ අදහස් දැක්වූ විපක්ෂයේ මන්ත්‍රීවරුන් දස දෙනෙකුගෙන් පමණ ප්‍රකාශ සටහන් කර ගැනීමට බලාපොරොත්තු වන බව නීතිපති දෙපාර්තමේන්තුව පසුගියදා අධිකරණය හමුවේ ප්‍රකාශ කර තිබෙනවා.

මෙම මන්ත්‍රීවරුන් සලේ සම්බන්ධයෙන් ප්‍රකාශ සිදුකර ඇත්තේ විශ්වාසදායී තොරතුරු මත පදනම්වයැයි නීතිපති දෙපාර්තමේන්තුව විශ්වාස කරන බව ද අධිකරණය හමුවේ ප්‍රකාශ කර තිබුණා.