අමෙරිකා - ඉරාන ගැටුම් තිබුණත් ලෝක වෙළඳපොළේ තෙල් මිල පහළට - ට්‍රම්ප්ගෙනුත් විශේෂ ප්‍රකාශයක්

අමෙරිකා එක්සත් ජනපදය සහ ඉරානය අතර යළි මතුවෙමින් පවතින ගැටුම් තත්ත්වය හේතුවෙන් මැදපෙරදිග තෙල් සැපයුමට බාධා එල්ල විය හැකි බවට ආයෝජකයින් අතර පැවැති අවිනිශ්චිතතාව හමුවේ, අද (03) ලෝක වෙළඳපොළේ බොරතෙල් මිල සුළු පහළ යාමක් පෙන්නුම් කරන බව රොයිටර්ස් පුවත් සේවය පවසනවා.

ඒ අනුව Brent බොරතෙල් බැරලයක මිල ශත 43කින් (0.45%) පහළ ගොස් ඩොලර් 95.20ක් ලෙස සටහන්ව තිබෙනවා.

එසේම WTI බොරතෙල් බැරලයක මිල ශත 24කින් පහළ ගොස් ඩොලර් 90.77ක් ලෙස සටහන් වුණා.

පසුගිය වෙළඳ වාරය තුළ Brent සහ WTI මිල ගණන් බැරලයකට ඩොලර් 2ක උපරිමයක සහ ඩොලර් 1ක අවමයක අගයන් අතර දෝලනය වීමක් දක්නට ලැබුණු බවයි විදෙස් මාධ්‍ය පවසා සිටියේ.

එම වෙළඳ වාරයේ වාර්තා වූ මිල ගණන් ජූලි 24 වැනිදායින් පසු වාර්තා වූ ඉහළම අගයන් වෙනවා.

ඉරානයට එරෙහිව යළි ආරම්භ කළ හමුදාමය ක්‍රියාමාර්ගය "දීර්ඝ කාලයක්" නොපවතිනු ඇති බවත්, එක්සත් ජනපද හමුදා විසින් ඉරානයේ රේඩාර් සහ මිසයිල පද්ධති ඉලක්ක කර ප්‍රහාර එල්ල කළ බවත් අමෙරිකානු ජනාධිපති ඩොනල්ඩ් ට්‍රම්ප් ඊයේ (02) ප්‍රකාශ කළා.

"හෝමූස් සමුද්‍ර සන්ධිය ආශ්‍රිතව ඔවුන් නිර්මාණය කිරීමට උත්සාහ කළ ආරක්ෂක සහ ප්‍රහාරාත්මක නව උපකරණ සියල්ලම පාහේ අපි විනාශ කළා. ඊයේ රාත්‍රියේ ඉතා ප්‍රබල ප්‍රහාරයක් එල්ල කළ අතර, ඕනෑම අවස්ථාවක නැවත එවැනි ප්‍රහාරයක් එල්ල කිරීමට අපි සූදානම්," යනුවෙන් ජනාධිපති ට්‍රම්ප් වැඩිදුරටත් සඳහන් කළා.

මෙම සන්සුන් තත්ත්වය තවදුරටත් පැවතුණහොත්, හෝමූස් සමුද්‍ර සන්ධිය හරහා රහසිගත නෞකා සහ නෞකාවෙන් නෞකාවට කෙරෙන තෙල් හුවමාරු මගින් සිදු කෙරෙන තෙල් ප්‍රවාහනය නැවතත් පසුගිය සතියේ පැවැති මට්ටමට පැමිණීමට වැඩි කාලයක් ගත නොවනු ඇති බව විශ්ලේෂක ටෝනි සිකමෝර් පෙන්වා දෙන්නේ.

කප්ලර් ආයතනයේ මූලික නෞකා දත්තවලට අනුව, බදාදා දිනයේදී වාණිජ නෞකා 4ක් පමණක් හෝමූස් සමුද්‍ර සන්ධිය හරහා ගමන් කර ඇති අතර, එය සාමාන්‍යයෙන් දින 10ක් තුළ ගමන් කරන නෞකා 13ක අගයට වඩා සැලකිය යුතු පහළ යාමක්.