බංග්ලාදේශය පරදා ශ්‍රී ලංකා කාන්තාවන් ආසියානු කුසලානයේ අවසන් පූර්ව වටයට

එක්සත් අරාබි එමීර් රාජ්‍යයේ ඩුබායි හි පැවැත්වෙන 2026 කාන්තා විස්සයි20 ආසියානු කුසලාන තරගාවලියේ (Women's Asia Cup 2026) B කාණ්ඩයේ පැවැති තීරණාත්මක තරගයෙන් බංග්ලාදේශ කාන්තා කණ්ඩායම කඩුලු 4කින් පරාජය කිරීමට ශ්‍රී ලංකා කාන්තා කණ්ඩායම සමත් වුණා.

මෙම ජයග්‍රහණයත් සමඟ ශ්‍රී ලංකාව තරගාවලියේ අවසන් පූර්ව වටයේ සිය ස්ථානය තහවුරු කර ගැනීමට සමත් වුණා.

ඩුබායි ජාත්‍යන්තර ක්‍රිකට් ක්‍රීඩාංගණයේ පැවැති මෙම තරගයේ කාසියේ වාසිය දිනූ ශ්‍රී ලංකා කණ්ඩායමේ නායිකා චමරි අතපත්තු ප්‍රථමයෙන් පන්දු රැකීමට තීරණය කළා.

ඒ අනුව ප්‍රථමයෙන් පන්දුවට පහරදුන් බංග්ලාදේශ කාන්තා කණ්ඩායම නියමිත ඕවර 20 අවසානයේ කඩුලු 8ක් දැවී ලකුණු 114ක් රැස් කළා.

බංග්ලාදේශය වෙනුවෙන් සොබානා මොස්තාරි (Sobhana Mostary) ලකුණු 34ක් සහ දිලාරා අක්තර් (Dilara Akter) ලකුණු 26ක් ලබා ගත්තා.

පන්දු යැවීමේදී ශ්‍රී ලංකාවේ චමුදි ප්‍රබෝධා ලකුණු 21කට කඩුලු 3ක් සහ සුගන්දිකා කුමාරි ලකුණු 22කට කඩුලු 2ක් දවා ගැනීමට සමත් වුණා.

පිළිතුරු ඉනිම ක්‍රීඩා කළ ශ්‍රී ලංකා කණ්ඩායම ඕවර 19.2කදී කඩුලු 6ක් පමණක් දැවී ලකුණු 115ක් ලබාගනිමින් තරගයේ ජයග්‍රහණය තහවුරු කර ගැනීමට සමත් වුණා.

ශ්‍රී ලංකා ඉනිම වෙනුවෙන් විශිෂ්ට පිතිහරඹයක නිරත වූ හර්ෂිතා සමරවික්‍රම පන්දු 37කදී හතරේ පහර 4ක් සහ හයේ පහර 2ක් සමඟින් නොදැවී ලකුණු 48ක් රැස් කරමින් ජයග්‍රහණය කරා කණ්ඩායම මෙහෙයවූවා.

ඊට අමතරව නිලක්ෂි ද සිල්වා ලකුණු 18ක් සහ ඉමේසා දුලානි ලකුණු 12ක් ලබා ගත්තා

පන්දු යැවීමේදී බංග්ලාදේශයේ මරුෆා අක්තර් ලකුණු 21කට කඩුලු 3ක් බිද හෙලුවා.