துருக்கியை 2-0 என வீழ்த்தி அவுஸ்திரேலிய அணி அபார வெற்றி!

உலகக் கிண்ணக் கால்பந்து தொடரின் குழு 'D' பிரிவிற்கான இன்றைய போட்டியில் அவுஸ்திரேலியா மற்றும் துருக்கி அணிகள் மோதின.

இந்த ஆட்டத்தில் துருக்கி அணியை 2-0 என்ற கோல் கணக்கில் வீழ்த்தி அவுஸ்திரேலிய அணி அபார வெற்றி பெற்றுள்ளது.

கனடாவின் வான்கூவர் நகரில் நடைபெற்ற இந்த போட்டியின் 26ஆவது நிமிடத்தில் அவுஸ்திரேலிய அணியின் நெஸ்டோரி இரான்குண்டா ( Nestory irankunda)முதலாவது கோலை அடித்து அணியை முன்னிலைப்படுத்தினார்.

இதனைத் தொடர்ந்து விறுவிறுப்பாக நடைபெற்ற ஆட்டத்தின் 74ஆவது நிமிடத்தில் கொன்னர் மெட்கால்ஃபெ (Connor Metcalfe )அவுஸ்திரேலிய அணி சார்பாக இரண்டாவது கோலை அடித்தார்.

இறுதிவரை துருக்கி அணியால் எந்தவொரு கோலையும் அடிக்க முடியாமல் போனதை அடுத்து, அவுஸ்திரேலிய அணி 2-0 என வெற்றியைத் தன்வசப்படுத்தியது.