கொங்கோ குடியரசுடன் போர்த்துக்கல் அதிர்ச்சி சமநிலை: ரொனால்டோ ஏமாற்றம்!

உலகக் கிண்ணக் கால்பந்து தொடரின் 'K' குழுவின் ஆரம்பப் போட்டியில், பலம்மிக்க போர்த்துக்கல் அணியை 1-1 என்ற கோல் கணக்கில் சமநிலைப்படுத்தி கொங்கோ ஜனநாயக குடியரசு அதிர்ச்சி கொடுத்துள்ளது.

போட்டியின் 6ஆவது நிமிடத்தில் போர்த்துக்கல் அணியின் ஜோவா நெவ்ஸ் தலையால் முட்டி கோல் அடித்து தனது அணிக்கு ஆரம்ப முன்னிலையைப் பெற்றுக்கொடுத்தார்.

எனினும், ஆட்டத்தின் பெரும்பகுதி பந்துப் பரிமாற்றத்தை போர்த்துக்கல் தன்வசம் வைத்திருந்தபோதிலும், அவர்களால் அதனை மேலதிக கோல்களாக மாற்ற முடியாமல் போனது.

இதற்குத் தண்டனையாக, முதல் பாதியின் கூடுதல் நேரத்தில் (45+5' நிமிடம்) கொங்கோ அணியின் யோவான் விசா மிகச் சிறப்பான முறையில் கோல் அடித்து ஆட்டத்தைச் சமப்படுத்தினார்.

உலகத் தரவரிசையில் 46ஆவது இடத்தில் இருக்கும் கொங்கோ அணி உலகக் கிண்ண வரலாற்றில் பதிவு செய்த முதலாவது கோல் இதுவாகும்.

இந்த போட்டியில் போர்த்துக்கல் அணியின் தலைவர் கிறிஸ்டியானோ ரொனால்டோ, அர்ஜென்டினாவின் லியோனல் மெஸ்ஸிக்கு இணையாகத் தனது 6ஆவது உலகக் கிண்ணத் தொடரில் களம் கண்டு சாதனை படைத்துள்ளார்.

அத்துடன், உலகக் கிண்ணப் போட்டியொன்றில் களமிறங்கிய மிக வயதான வெளிக்கள வீரர் (41 வயது 132 நாட்கள்) என்ற பெருமையையும் அவர் பெற்றார்.

முழுப் போட்டியிலும் விளையாடிய ரொனால்டோவுக்கு சில நல்ல வாய்ப்புகள் கிடைத்த போதிலும், அவரால் பந்தைக் கோலாக மாற்ற முடியாமல் போனது.

இதனால் 6 வெவ்வேறு உலகக் கிண்ணத் தொடர்களில் கோல் அடித்த முதல் வீரர் என்ற சாதனையை நோக்கி அவர் இன்னும் காத்திருக்க வேண்டியுள்ளது.

இதனைத் தொடர்ந்து, 'K' குழுவின் அடுத்த போட்டிகளில் போர்த்துக்கல் அணி எதிர்வரும் 23 ஆம் திகதி உஸ்பெகிஸ்தானையும், கொங்கோ அணி எதிர்வரும் 24 ஆம் திகதி கொலம்பியாவையும் எதிர்கொள்ளவுள்ளன.