பெரிய வெங்காயத்துக்கு நிலையான விலை: அரசாங்கத்தின் புதிய திட்டம்

இலங்கையில் உள்ளூர் பெரிய வெங்காய விவசாயிகளுக்கு நியாயமான முறையில் பயனளிக்கும் வகையில், ஒரு நிலையான விலையை அறிமுகப்படுத்த அரசாங்கம் தீர்மானித்துள்ளதாக ஜனாதிபதி ஊடகப் பிரிவு தெரிவித்துள்ளது.

இது குறித்த முறையான திட்டத்தை உருவாக்குவதற்கான கலந்துரையாடல் ஒன்று இன்று (17) காலை ஜனாதிபதி செயலகத்தில் விவசாய அமைச்சர் கே.டி. லால்காந்த மற்றும் வர்த்தக அமைச்சர் வசந்த சமரசிங்க ஆகியோரின் தலைமையில் நடைபெற்றது.

நெற் பயிர்ச்செய்கையாளர்களுக்கு இருப்பது போன்ற ஒரு முறையான திட்டம் பெரிய வெங்காயத்துக்கு அறிமுகப்படுத்துவது இதுவே முதல் முறை என அமைச்சர் கே.டி. லால்காந்த சுட்டிக்காட்டினார்.

மேலும், சிறிய நிலங்களில் பயிரிடும் விவசாயிகளின் நலன்களைக் கவனத்தில் கொள்ள வேண்டும் என்றும், துல்லியமான தரவுகளின் அடிப்படையில் முடிவுகள் எடுக்கப்பட வேண்டும் என்றும் அவர் வலியுறுத்தினார்.

இந்தப் புதிய திட்டத்தின் மூலம், விவசாயிகளின் சவால்களுக்கு முன்னுரிமை அளிப்பதோடு, நுகர்வோருக்கு மலிவு விலையில் வெங்காயம் கிடைப்பது உறுதி செய்யப்படும்.

விலை ஏற்ற இறக்கங்களே பிரதான சவாலாக உள்ளதாக விவசாயிகள் கோரிக்கை விடுத்த நிலையில், இந்த ஆண்டில் 17% ஆக உள்ள உற்பத்தியை 2027 ஆம் ஆண்டுக்குள் 27% ஆக அதிகரிக்க இலக்கு நிர்ணயிக்கப்பட்டுள்ளது.

அத்துடன், அவசர காலங்களில் உடனடித் தலையீடுகளை மேற்கொள்வதற்காக அனைத்து விவசாயிகளும் கமநல அபிவிருத்தித் திணைக்களத்தின் கீழ் பதிவு செய்ய வேண்டும் எனவும் அமைச்சர் கே.டி. லால்காந்த கோரியுள்ளார்.