வெள்ளைக் கடற்கரையில் சிக்கிய 6 மர்ம மூடைகள்

நெடுந்தீவு (Delft Island) வெள்ளைக் கடற்கரை பகுதியில் முன்னெடுக்கப்பட்ட விசேட கடலோரப் பாதுகாப்பு நடவடிக்கையின் போது, சட்டவிரோதமான முறையில் நாட்டுக்குள் கடத்த முயன்றதாகச் சந்தேகிக்கப்படும் வெளிநாட்டுச் சிகரெட்டுகள், கிருமிநாசினிகள் மற்றும் வாசனைத் திரவியங்கள் உள்ளிட்ட பெருமளவிலான பொருட்களை இலங்கை கடற்படையினர் கைப்பற்றியுள்ளனர்.

வட கடற்படை கட்டளைத் தளத்திற்கு உட்பட்ட 'SLNS வசப' முகாமின் கடற்படை வீரர்களினால் நேற்று (24) மேற்கொள்ளப்பட்ட விசேட ரோந்துப் பணியின் போதே இப்பொருட்கள் மீட்கப்பட்டுள்ளன.

வெள்ளைக் கடற்கரைப் பகுதியில் கடற்படையினர் சோதனையிட்ட போது, அங்கே கைவிடப்பட்ட நிலையில் காணப்பட்ட 6 சந்தேகத்திற்கிடமான சாக்கு மூடைகளைக் கைப்பற்றி தீவிரமாகப் பரிசோதித்துள்ளனர்.

இதன்போது, அந்த மூட்டைகளில் இருந்து 500 பாக்கெட் வெளிநாட்டுச் சிகரெட்டுகள், 2,295 பாக்கெட் கிருமிநாசினிகள், 2,569 மருத்துவ களிம்புகள் , 165 அழகுசாதன கிரீம்கள் மற்றும் 64 வாசனைத் திரவிய போத்தல்கள்ஆகியவை மீட்கப்பட்டுள்ளன.

இவ்வாறு கைப்பற்றப்பட்ட கடத்தல் பொருட்கள் அனைத்தும் மேலதிக சட்ட நடவடிக்கைகளுக்காகவும் மேலதிக விசாரணைகளுக்காகவும் நெடுந்தீவு காவல் நிலையத்தில் ஒப்படைக்கப்பட்டுள்ளதாகக் கடற்படை தெரிவித்துள்ளது.