இலங்கையில் டெங்கு நோயாளர்களின் எண்ணிக்கை தொடர்ந்து அதிகரித்து வருவதாகவும், இந்நிலைமை இன்னமும் அபாயகரமான மட்டத்திலேயே நீடிப்பதாகவும் தேசிய டெங்கு ஒழிப்பு பிரிவின் பதில் பணிப்பாளர் மருத்துவர் கபில கன்னங்கர எச்சரித்துள்ளார்.

நேற்று இடம்பெற்ற ஊடக சந்திப்பொன்றில் இது குறித்து விளக்கமளித்த அவர், 24 மணித்தியாலங்களில் புதிதாக 1,217 டெங்கு நோயாளர்கள் அடையாளம் காணப்பட்டுள்ளதுடன், நாட்டில் இதுவரை பதிவாகியுள்ள ஒட்டுமொத்த டெங்கு நோயாளர்களின் எண்ணிக்கை 55,406 ஆக உயர்ந்துள்ளது எனவும் குறிப்பிட்டார்.

கடந்த ஜூன் மாத காலப்பகுதிக்குள் மாத்திரம் 21,565 நோயாளர்கள் பதிவாகியுள்ளனர். அத்துடன் டெங்கு நோய் காரணமாக இந்த வருடத்தில் இதுவரை 32 மரணங்கள் பதிவாகியுள்ளதாகவும் மருத்துவர் கபில கன்னங்கர தெரிவித்தார்.

வழமைப் போன்றே மேல் மாகாணத்திலேயே அதிகளவிலான டெங்கு நோயாளர்கள் பதிவாகியுள்ளனர். மொத்த நோயாளர்களில் 52.5 சதவீதமானோர் மேல் மாகாணத்தைச் சேர்ந்தவர்களாவர்.

கொழும்பு மாவட்டத்தில் 11,392 நோயாளர்களும், கம்பஹா மாவட்டத்தில் 11 006 நோயாளர்களும் பதிவாகியுள்ளனர். இந்த இரு மாவட்டங்களுமே டெங்கு பரவலில் முதன்மையாக உள்ளதாக அவர் சுட்டிக்காட்டினார்.

கொழும்பு மற்றும் கம்பஹா மாவட்டங்களில் முன்னெடுக்கப்பட்ட ஆய்வுகளின்படி, வீடுகள், பொது நிறுவனங்கள் மற்றும் அதனைச் சுற்றியுள்ள சூழலில் இன்னும் நுளம்புகள் பெருகும் இடங்கள் அப்படியே காணப்படுவது கண்டறியப்பட்டுள்ளது.

தற்போதைய சூழலில் நுளம்புகளிடையே டெங்கு வைரஸ் வகை 2 மற்றும் வகை 3 (Denv-2 & Denv-3) பரவியுள்ளதால், நுளம்பு கடிக்கு உள்ளாகுபவர்கள் எளிதில் பாதிக்கப்படுவதாக அவர் விளக்கமளித்தார்.

பாடசாலைகள் மற்றும் அரச நிறுவன வளாகங்களிலேயே நுளம்புகள் பெருகும் இடங்கள் அதிகளவில் கண்டறியப்பட்டுள்ளன.

இதனால் கல்வி அமைச்சு மற்றும் சுகாதார அதிகாரிகளின் ஒருங்கிணைப்பில் பாடசாலைகளை இலக்கு வைத்து விசேட டெங்கு ஒழிப்பு திட்டங்கள் முன்னெடுக்கப்பட்டு வருகின்றன. சிறுவர்களின் நோய் எதிர்ப்பு சக்தி குறைவாக இருக்க வாய்ப்புள்ளதால், அவர்கள் எளிதில் பாதிக்கப்படக்கூடிய அபாயம் உள்ளதாகவும் அவர் குறிப்பிட்டார்.

அதேநேரம், சுகாதார அதிகாரிகள் மற்றும் பொதுச் சுகாதார பரிசோதகர்கள் தொடர்ந்து அறிவுறுத்தல்களை வழங்கினாலும், பொதுமக்கள் மத்தியில் இன்னும் போதிய விழிப்புணர்வு இல்லை என மருத்துவர் கபில கன்னங்கர கவலை வெளியிட்டுள்ளார்.

டெங்கு நோயாளர்கள் இனங்காணப்பட்ட வீடுகளிலேயே மீண்டும் நுளம்பு குடம்பிகள் கண்டறியப்படும் அவலநிலை நீடிப்பதாக அவர் சுட்டிக்காட்டினார்.

தற்போது பெரும்பாலான மருத்துவமனைகள் தங்களின் அதிகபட்ச கொள்ளளவை எட்டியுள்ளதால் சுகாதார ஊழியர்கள் கடுமையான பணிச்சுமைக்கு ஆளாகியுள்ளனர்.

இந்தநிலை தொடர்ந்தால், டெங்கு நோயாளர்களுக்கு மட்டுமன்றி ஏனைய அவசர நோய்களுக்காக வரும் நோயாளர்களுக்கும் உரிய சிகிச்சைகளை வழங்குவதில் சிக்கல் ஏற்படும் என அவர் எச்சரித்துள்ளார்.

எனவே, இந்த நிலைமையைக் கட்டுப்படுத்தவும், உயிரிழப்புகளைத் தடுக்கவும் பொதுமக்கள் தங்கள் வீடுகள் மற்றும் சூழலைத் தூய்மையாக வைத்துக்கொண்டு, நுளம்புகள் பெருகும் இடங்களை முற்றாக அழிக்க முழுமையான ஒத்துழைப்பை வழங்க வேண்டும் என தேசிய டெங்கு ஒழிப்பு பிரிவின் பதில் பணிப்பாளர் மருத்துவர் கபில கன்னங்கர அவசரமாக கோரியுள்ளார்.

வவுனியா மாநகரசபையின் முன்னாள் முதல்வர் எஸ். காண்டீபன் உள்ளிட்ட நான்கு பேரைக் கைது செய்ய நீதிமன்றம் அனுமதி வழங்கியுள்ளது.

வவுனியா மாநகரசபையின் செங்கோல், பதக்கம் மற்றும் முதல்வர் ஆடை என்பன காணாமல் போயுள்ளதாகச் சபையின் செயலாளரால் நேற்றுமுன்தினம் (30) வவுனியா தலைமையக காவல்துறை நிலையத்தில் முறைப்பாடு செய்யப்பட்டிருந்தது.

இந்த முறைப்பாட்டுக்கு அமைய, CCTV காட்சிகளின் உதவியுடன் வவுனியா தலைமையக காவல்துறை அதிகாரிகள் தீவிர விசாரணைகளை முன்னெடுத்திருந்தனர்.

இந்த விசாரணைகளின் அடிப்படையில் தயாரிக்கப்பட்ட அறிக்கை, காவல்துறையினரால் இன்று நீதிமன்றத்தில் சமர்ப்பிக்கப்பட்டது.

நீதிமன்றத்தில் சமர்ப்பிக்கப்பட்ட அறிக்கையினைப் பரிசீலித்த நீதவான், காவல்துறையினரின் கோரிக்கைக்கு அமையச் சந்தேகநபர்களைக் கைது செய்ய உத்தரவிட்டார்.

இதன்படி, முன்னாள் முதல்வர் எஸ். காண்டீபன் உள்ளிட்ட நான்கு சந்தேகநபர்களையும் கைது செய்து நீதிமன்றத்தில் முன்னிலைப்படுத்துமாறு உத்தரவிடப்பட்டுள்ளதாக வவுனியா தலைமையக காவல்துறை நிலையத்தின் பொறுப்பதிகாரி தெரிவித்தார்.

2022 ஆம் ஆண்டு ஏற்பட்ட கடுமையான பொருளாதார நெருக்கடியிலிருந்து இலங்கை வெற்றிகரமாக மீட்சியடைந்துள்ளதை உலக வங்கி உத்தியோகபூர்வமாக உறுதிப்படுத்தியுள்ளது.

நாட்டின் தொழில்துறைகளில் ஏற்பட்டுள்ள மறுமலர்ச்சி, நிதி மற்றும் சுற்றுலாத் துறைகளின் சிறப்பான வளர்ச்சி காரணமாக 2025 ஆம் ஆண்டில் இலங்கையின் உண்மையான மொத்த உள்நாட்டு உற்பத்தி 5 சதவீதத்தால் வளர்ச்சியடைந்துள்ளது.

இதன் காரணமாக, உலக வங்கி இலங்கையை மீண்டும் ‘உயர் நடுத்தர வருமானப் பொருளாதார’ (Upper-Middle-Income Economy) நாடாக வகைப்படுத்தியுள்ளது.

எனினும், இலங்கை இந்த வருமான வரம்பை மிகக் குறைந்த அளவிலேயே கடந்துள்ளது என்றும் உலக வங்கி சுட்டிக்காட்டியுள்ளது.

இதேவேளை, இலங்கையின் இந்த பொருளாதார மீட்சிப் பயணத்தை மேலும் வலுப்படுத்தும் நோக்கில், உலக வங்கியின் நிறைவேற்று பணிப்பாளர்கள் குழு 150 மில்லியன் அமெரிக்க டொலர் நிதியுதவியை அங்கீகரித்துள்ளது.

நாட்டில் முதலீடுகளை அதிகரித்தல், போட்டித்திறனை மேம்படுத்துதல் மற்றும் புதிய வேலைவாய்ப்புகளை உருவாக்குதல் ஆகியவற்றை மையமாகக் கொண்ட மறுசீரமைப்பு நிகழ்ச்சி நிரலுக்கு ஆதரவாகவே இந்த நிதி வழங்கப்பட்டுள்ளது.