நுவரெலியா உந்துருளி பந்தயத்தில் விபத்து: காயமடைந்த இரு போட்டியாளர்கள் மருத்துவமனையில் அனுமதி!

நுவரெலியா, பிளக்பூல் மற்றும் மாகஸ்தோட்ட இடையே இன்று நடைபெற்ற உந்துருளி பந்தயத்தின் போது ஏற்பட்ட விபத்தில் இரண்டு போட்டியாளர்கள் காயமடைந்துள்ளனர்.

நுவரெலியா மாநகர சபையும், கொழும்பிலுள்ள தனியார் அமைப்பொன்றும் இணைந்து, நுவரெலியா - அம்பேவளை பிரதான வீதியில் பிளக்பூல் பாலத்தில் தொடங்கி, செங்குத்தான மலைகள் மற்றும் வளைந்து செல்லும் தேயிலைத் தோட்டங்கள் வழியாக மாகஸ்தோட்ட வரை செல்லும் நேரக் கணக்கீட்டு பந்தயத்தை ஏற்பாடு செய்திருந்தன.

இன்றும் நாளையும் நடைபெறும் இந்தப் போட்டியின் இன்றைய நிகழ்வில் 400 சிசி பிரிவு பந்தயத்தில் பல போட்டியாளர்கள் பங்கேற்றனர்.

இதன்போது நுவரெலியா பகுதியில் நிலவிய சீரற்ற வானிலை காரணமாகக் கட்டுப்பாட்டை இழந்த இரண்டு உந்துருளிகள் வீதியை விட்டு விலகி, அருகில் இருந்த தேயிலைத் தோட்டத்துக்குள் பாய்ந்து விபத்துக்குள்ளானதாக தெரியவந்துள்ளது.

விபத்தில் காயமடைந்த இருவரும் உடனடியாக மீட்கப்பட்டு சிகிச்சைகளுக்காக நுவரெலியா மாவட்ட பொது மருத்துவமனையில் சேர்க்கப்பட்டுள்ளதாக காவல்துறை தெரிவித்துள்ளது.