அரசாங்கத்தின் மீதான மக்கள் ஆதரவு சரிவு; பொருளாதார எதிர்பார்ப்புகளும் வீழ்ச்சி!

இலங்கையின் தற்போதைய தேசிய மக்கள் சக்தி அரசாங்கத்தின் செயற்பாடுகள் மற்றும் நாட்டின் தற்போதைய பொருளாதார நிலைமைகள் குறித்த மக்களின் திருப்தி நிலையும் எதிர்பார்ப்புகளும் கணிசமாகக் குறைந்துள்ளதாக தெரிவிக்கப்படுகிறது.

'வெரிட்டே ரிசர்ச்' (Verité Research) நிறுவனம் வெளியிட்டுள்ள 'நாட்டின் மனநிலை' (Mood of the Nation) குறித்த ஜூலை மாத அறிக்கையில் இந்த விடயம் தெரிவிக்கப்பட்டுள்ளது.

அதன்படி, கடந்த பெப்ரவரி மாதத்துடன் ஒப்பிடுகையில், ஜூலை மாதத்தில் அனைத்து முக்கியக் குறிகாட்டிகளிலும் சரிவு பதிவாகியுள்ளது.

அரசாங்கத்தின் மீதான ஆதரவு (Government Approval): அரசாங்கம் செயல்படும் விதம் குறித்து பெப்ரவரி மாதத்தில் 65 சதவீதமாக இருந்த ஆதரவு நிலை, ஜூலை மாதத்தில் 15 சதவீதத்தினால் குறைந்து 50 சதவீதமாக வீழ்ச்சியடைந்துள்ளது.

பொருளாதாரத்தின் நிலை (State of the Economy): நாட்டின் தற்போதைய பொருளாதார நிலை நன்றாக உள்ளது என்று கருதுபவர்களின் விகிதம் பெப்ரவரி மாதத்தில் 57 சதவீதமாக இருந்த நிலையில், தற்போது 19 சதவீதம் குறைந்து 38 சதவீதமாக வீழ்ச்சியடைந்துள்ளது.

பொருளாதார எதிர்கால எதிர்பார்ப்பு (Economic Outlook): நாட்டின் பொருளாதாரம் சீரடைந்து வருகிறது என்று நம்புவோரின் சதவீதம் பெப்ரவரியில் 64 சதவீதமாக இருந்த நிலையில், ஜூலையில் 22 சதவீதம் சரிந்து 42 சதவீதமாகக் குறைந்துள்ளது.

பொதுவான திருப்தி நிலை (Satisfaction): நாட்டில் நிலவும் ஒட்டுமொத்த சூழல் குறித்துத் திருப்தி அடைந்துள்ளதாகக் கூறிய மக்களின் விகிதம் 59 சதவீதத்திலிருந்து 21 சதவீதம் குறைந்து 38 சதவீதமாக வீழ்ச்சியடைந்துள்ளது.

இந்தநிலையில், 'வேன்கார்ட் சர்வே' (Vanguard Survey) நிறுவனத்தின் ஒத்துழைப்புடன், நாடு முழுவதும் உள்ள 2,013 பேரிடம் நடத்தப்பட்ட மாதிரி ஆய்வின் அடிப்படையில் இந்தத் தரவுகள் திரட்டப்பட்டுள்ளதாக 'வெரிட்டே ரிசர்ச்' நிறுவனம் தெரிவித்துள்ளது.