ட்ரம்பின் பேச்சை வைத்து கோடிகளில் பந்தயம்: 172,000 டொலருக்கும் அதிகமான அபராதம் !

அமெரிக்க ஜனாதிபதி டொனால்ட் ட்ரம்பின் உரைகள் குறித்து ரகசியத் தகவல்களைப் பயன்படுத்தி பந்தயம் (Insider Trading) கட்டிய வெள்ளை மாளிகையின் முன்னாள் டெலிபிராம்ப்டர் (Teleprompter) இயக்குநருக்கு 172,000 டொலருக்கும் அதிகமான அபராதம் விதிக்கப்பட்டுள்ளது.

காஷி (Kalshi) என்ற கணிப்பு சந்தைத் தளத்தில் (Prediction Market Platform), ட்ரம்ப் தனது உரைகளில் என்ன வார்த்தைகளைப் பயன்படுத்துவார் என்பது குறித்து முன்கூட்டியே கசிந்த தகவல்களை வைத்து கேப்ரியல் பெரெஸ் (Gabriel Perez) என்ற வெள்ளை மாளிகையின் முன்னாள் ஊழியர் முறையற்ற வியாபாரத்தில் ஈடுபட்டுள்ளார்.

இந்தநிலையில், பெரெஸ் தான் ஈட்டிய இலாபத் தொகையான $107,539.02-ஐத் திருப்பிக் கொடுக்க வேண்டும். அத்துடன், சிவில் அபராதமாக $65,000 செலுத்த வேண்டும் என்று அமெரிக்க வர்த்தக ஆணையம் உத்தரவு பிறப்பித்துள்ளது.

இதேவேளை, விசாரணையின் போது அவர் முழுமையாக ஒத்துழைப்பு அளித்த காரணத்தினால் அபராதம் சற்று குறைக்கப்பட்டுள்ளதுடன், அவருக்கு 3 ஆண்டுகள் வர்த்தகத் தடையும் விதிக்கப்பட்டுள்ளது.

இந்தச் செயல் வெளிச்சத்திற்கு வந்ததைத் தொடர்ந்து, அவர் ஏற்கனவே வெள்ளை மாளிகை பணியிலிருந்து விடுவிக்கப்பட்டு ஊதியமில்லா விடுப்பில் வைக்கப்பட்டிருந்தார் என்பதும் குறிப்பிடத்தக்கது.