செப்டம்பர் 25 முதல் ஒக்டோபர் 1 வரை ‘தேசிய சிறுவர் தின வாரம்’: அமைச்சரவை அனுமதி

சிறுவர் உரிமைகள் குறித்த விழிப்புணர்வை ஏற்படுத்தவும், சிறுவர் பாதுகாப்பில் சமூகத்தின் பங்கேற்பை வலுப்படுத்தவும் 2026 செப்டம்பர் 25 முதல் ஒக்டோபர் 01 வரையிலான காலப்பகுதியை 'தேசிய சிறுவர் தின வாரம் - 2026' ஆக பிரகடனப்படுத்துவதற்கு அமைச்சரவை அனுமதி அளித்துள்ளது.

சிறுவர் உரிமைகள், கல்வி, சுகாதாரம் மற்றும் நலன்புரி தொடர்பிலான விழிப்புணர்வை ஏற்படுத்தும் நோக்கில் இலங்கையில் ஆண்டுதோறும் ஒக்டோபர் 01 ஆம் திகதி சிறுவர் தினம் கொண்டாடப்பட்டு வருகின்றது.

பாரம்பரிய சிறுவர் பாதுகாப்பு கவலைகளுக்கு அப்பாற்பட்டு, இணையம் மற்றும் டிஜிட்டல் தொழில்நுட்பம் சார்ந்த அபாயங்கள், உளவியல் மற்றும் சமூக அழுத்தங்கள், புறக்கணிப்பு மற்றும் பல்வேறு சமூக-பொருளாதார சவால்களுக்கு சிறுவர்கள் ஆளாகும் நிலை அதிகரித்துள்ளதாக அரசாங்கம் சுட்டிக்காட்டியுள்ளது.

அத்துடன் பெற்றோர், ஆசிரியர்கள், அரச அதிகாரிகள், சேவை வழங்குநர்கள் மற்றும் சிறுவர்களுடன் தினமும் பழகும் பொதுமக்கள் மத்தியில் சிறுவர் உரிமைகள் மற்றும் பாதுகாப்பு குறித்த விழிப்புணர்வை மேம்படுத்த வேண்டியதன் அவசியத்தையும் அரசாங்கம் அடையாளம் கண்டுள்ளது.

இதற்கமைய, தேசிய சிறுவர் தினக் கொண்டாட்டத் திட்டத்துடன் இணைந்து 'தேசிய சிறுவர் தின வாரமும்' நடைமுறைப்படுத்தப்படவுள்ளதுடன், பொதுமக்களின் விழிப்புணர்வை அதிகரிக்கவும், சிறுவர்கள் மீதான சமூக உணர்திறனை வலுப்படுத்தவும், சிறுவர் பாதுகாப்பில் அதிக சமூகப் பங்கேற்பை ஊக்குவிக்கவும் சிறப்புத் திட்டங்கள் திட்டமிடப்பட்டுள்ளன.

மகளிர் மற்றும் சிறுவர் விவகார அமைச்சரினால் சமர்ப்பிக்கப்பட்ட 2026 செப்டம்பர் 25 முதல் ஒக்டோபர் 01 வரை 'தேசிய சிறுவர் தின வாரம் - 2026' ஆக பிரகடனப்படுத்தும் இந்த யோசனைக்கு அமைச்சரவை அனுமதி வழங்கியுள்ளது.