லண்டன் - யாழ்ப்பாணம் நேரடி வானூர்தி சேவை: பிரித்தானிய நாடாளுமன்ற உறுப்பினர் கையெழுத்து மனு ஆரம்பம்!

வட இலங்கையுடன் குடும்ப மற்றும் கலாசாரத் தொடர்புகளைக் கொண்ட பிரித்தானிய தமிழர்களின் பயண இணைப்புகளை மேம்படுத்துவதற்காக, லண்டனுக்கும் யாழ்ப்பாணம் சர்வதேச வானூர்தி நிலையத்திற்கும் இடையே நேரடி வானூர்திகளை இயக்குமாறு கோரப்பட்டுள்ளது.

பிரித்தானிய தொழில் கட்சி நாடாளுமன்ற உறுப்பினர் காரெத் தோமஸ் இந்த கோரிக்கையை முன்வைத்து கையெழுத்து மனுவை ஆரம்பித்துள்ளார்.

"யாழ்ப்பாணத்திற்கு நேரடி வானூர்திகளை கொண்டு வாருங்கள்" என்ற தலைப்பிலான இந்த மனு, திருமணங்கள், இறுதிச் சடங்குகள், சமய விழாக்கள் மற்றும் குடும்ப சந்திப்புகளுக்காக யாழ்ப்பாணத்திற்குப் பயணம் செய்யும் பிரித்தானிய தமிழ் குடும்பங்கள் எதிர்கொள்ளும் சிரமங்களை எடுத்துக்காட்டுகிறது.

ஹாரோ மேற்குப் பகுதியைப் பிரதிநிதித்துவப்படுத்தும் தோமஸ், தற்போது லண்டனுக்கும் யாழ்ப்பாணத்திற்கும் இடையே நேரடி வானூர்தி சேவைகள் இல்லை என்றும், இதனால் பயணிகள் கொழும்பு வழியாகப் பயணம் செய்து, சுமார் 400 கிலோமீட்டர் கூடுதல் பயணத்தை மேற்கொள்ள வேண்டிய கட்டாயத்தில் உள்ளனர் என்றும் கூறியுள்ளார்.

மனுவின்படி, கொழும்பிலிருந்து யாழ்ப்பாணத்திற்குச் சாலை அல்லது தொடருந்து வழியாகச் செல்லும் அடுத்த பயணத்திற்கு சுமார் ஆறு முதல் ஏழு மணி நேரம் ஆகிறது.

இது வயதான பயணிகள், சிறு குழந்தைகளுடன் வரும் குடும்பங்கள் மற்றும் முக்கிய குடும்ப நிகழ்வுகளுக்காகப் பயணம் செய்பவர்களுக்குக் குறிப்பிட்ட சிரமங்களை ஏற்படுத்துகிறது.

முன்மொழியப்பட்ட இந்த நேரடிச் சேவையானது, பயண நேரத்தைக் குறைக்கவும், அணுகலை மேம்படுத்தவும், ஐக்கிய இராச்சியத்திற்கும் வட இலங்கைக்கும் இடையே குடும்ப, கலாசார மற்றும் சமூகத் தொடர்புகளை வலுப்படுத்தவும் நோக்கமாகக் கொண்டுள்ளது.

வட மாகாணத்தில் சுற்றுலா, முதலீடு மற்றும் பொருளாதார மேம்பாட்டிற்கான சாத்தியமான நன்மைகளையும் இந்த மனு எடுத்துக்காட்டுகிறது.

இந்த நிலையில், லண்டன் மற்றும் யாழ்ப்பாண சர்வதேச வானூர்தி நிலையத்திற்கு இடையே வணிக ரீதியாக சாத்தியமான நேரடி வானூர்தி சேவையை ஆராய்ந்து ஆதரிப்பதற்காக, இங்கிலாந்து அரசாங்கம், இலங்கை அதிகாரிகள், வானூர்தி நிறுவனங்கள் மற்றும் லண்டன் வானூர்தி நிலையங்கள் ஒன்றிணைந்து செயல்படுமாறு தோமஸ் அழைப்பு விடுத்துள்ளார்.

முன்மொழியப்பட்ட இந்த வானுார்தி சேவை இணைப்பை நிறுவுவதற்கான முயற்சிகளுக்கு ஆதரவாக மனுவில் கையெழுத்திடுமாறு அவர் அழைப்பு விடுத்துள்ளார்.