ஒரே கூரையின் கீழ் அனைத்து அனுமதிகளும்:தேசிய வணிக வசதியளித்தல் மையம் நாளை திறப்பு!

தொழில்துறை மற்றும் முதலீடுகள் சார்ந்த அரச நிறுவனங்களுக்கு இடையிலான நிர்வாக மற்றும் ஒழுங்குமுறைத் தடைகளை நீக்கி, அனுமதி வழங்கும் நடைமுறைகளை விரைவுபடுத்தும் நோக்கில் நிறுவப்பட்டுள்ள ViYASA எனப்படும் தேசிய வணிக வசதியளித்தல் மையம் நாளை (22) திறக்கப்படவுள்ளது.

ஜனாதிபதியின் நேரடி வழிகாட்டலின் கீழ், நாட்டின் தொழில்துறைத் துறையில் நேர்மறையான மாற்றத்தைக் கொண்டுவரும் நோக்கில் இந்த மையம் உருவாக்கப்பட்டுள்ளது.

தொழிலதிபர்கள் மற்றும் முதலீட்டாளர்கள் புதிய வியாபாரங்களை ஆரம்பிக்கும் போதோ அல்லது நடத்திச் செல்லும் போதோ எதிர்நோக்கும் பிரச்சினைகளுக்குத் தீர்வு காண்பதற்கான முதன்மை மையமாக இது இயங்கும் என தெரிவிக்கப்பட்டுள்ளது.

மேலும், வணிக நடவடிக்கைகளுக்குத் தேவையான அத்தியாவசிய வசதிகளை விரைவாகப் பெற்றுக்கொடுக்கச் சம்பந்தப்பட்ட அரச நிறுவனங்களுடன் இணைந்து இந்த மையம் ஒருங்கிணைப்புப் பணிகளை மேற்கொள்ளும்.

கொழும்பு 7, ஹெக்டர் கொப்பேகடுவ மாவத்தையில் அமைந்துள்ள C-80 இலக்கக் கட்டடத்தில் அமைக்கப்பட்டுள்ள இந்த மையம், ஜனாதிபதியின் சிரேஷ்ட மேலதிக செயலாளர் சீவலி அருக்கொடவின் தலைமையில் இயங்கவுள்ளது.

தொழிலாளர் அமைச்சரும் நிதி மற்றும் திட்டமிடல் பிரதி அமைச்சருமான அனில் ஜயந்த பெர்னாண்டோ, கைத்தொழில் மற்றும் தொழில்முயற்சி அபிவிருத்தி அமைச்சர் சுனில் ஹந்துன்னெத்தி மற்றும் ஜனாதிபதியின் செயலாளர் நந்திக சனத் குமாநாயக ஆகியோரின் பங்கேற்புடன் இந்தத் திறப்பு விழா நடைபெறவுள்ளது.

இதன்போது, பொதுமக்களும் முதலீட்டாளர்களும் சேவைகளைப் பெற்றுக்கொள்வதற்காக உருவாக்கப்பட்டுள்ள nbfc.presidentsoffice.gov.lk என்ற உத்தியோகபூர்வ இணையதளமும் உத்தியோகபூர்வமாகத் தொடங்கி வைக்கப்படவுள்ளது.