ஜே.வி.பியின் கம்பஹா அலுவலக நிலையை மாற்ற நீதிமன்றம் இடைக்காலத் தடை!

மக்கள் விடுதலை முன்னணியின் (JVP) கம்பஹா கட்சி அலுவலகமான "அபே நிவஹன" (Ape Niwahana) கட்டடத்தின் தற்போதைய நிலையை மாற்றுவதையோ அல்லது அதன் உரிமையை மூன்றாம் தரப்பினருக்கு வழங்குவதையோ தடுக்கும் வகையில், கம்பஹா மேலதிக மாவட்ட நீதிபதி துலான் வீரவர்தன இடைக்காலத் தடை உத்தரவை பிறப்பித்துள்ளார்.

மக்கள் விடுதலை முன்னணியின் பொதுச் செயலாளர் டில்வின் சில்வா சமர்ப்பித்த மனுவை பரிசீலித்த நீதிமன்றம், இந்த உத்தரவைப் பிறப்பித்ததுடன் பிரதிவாதிகளுக்கு அழைப்பாணையும் விடுத்துள்ளது.

முன்னிலை சோஷலிசக் கட்சியின் உறுப்பினர்கள் மக்கள் விடுதலை முன்னணியில் "அபே நிவஹன" கட்சி அலுவலகத்தை சட்டவிரோதமாக ஆக்கிரமித்துள்ளதாக டில்வின் சில்வா தனது மனுவில் சுட்டிக்காட்டியுள்ளார்.

இந்தக் குற்றச்சாட்டு தொடர்பில் முன்னிலை சோஷலிசக் கட்சியின் குமார் குணரத்னம், துமிந்த நாகமுவ, சுஜித் குருவிட்ட உட்பட 20 பேர் பிரதிவாதிகளாக பெயரிடப்பட்டுள்ளனர்.

குறித்த சொத்து 2005 ஆம் ஆண்டு மக்கள் விடுதலை முன்னணயின் நிதியைக் கொண்டு 8 லட்சம் ரூபாவுக்கு வாங்கப்பட்டு, கட்சியின் பயன்பாட்டுக்காகப் பராமரிக்கப்பட்டு வந்தது. 2011 ஆம் ஆண்டு மக்கள் விடுதலை முன்னணியிலிருந்து பிரிந்து சென்ற குழுவினர் முன்னிலை சோஷலிசக் கட்சியை உருவாக்கியதைத் தொடர்ந்து இந்த சொத்து தொடர்பாகச் சிக்கல் உருவானது.

இந்த விவகாரம் தொடர்பில் 2018 ஆம் ஆண்டு தொடரப்பட்ட வழக்கின் தீர்ப்பில், 2022 ஆம் ஆண்டு பெப்ரவரி 28 ஆம் திகதியன்று இந்தச் சொத்து மக்கள் விடுதலை முன்னணிக்கே உரியது எனத் தீர்மானிக்கப்பட்டது.

இதன்படி, 2025 ஆம் ஆண்டு ஓகஸ்ட் 22 ஆம் திகதியன்று 19.57 மில்லியன் ரூபாய் மதிப்பில் கட்சியின் பொதுச் செயலாளருக்கு முறைப்படி உறுதிப்பத்திரம் மூலம் உரிமை மாற்றப்பட்டு, செப்டம்பர் 18 ஆம் திகதியன்று காணிப் பதிவும் இடம்பெற்றது.

கடந்த 2025 ஆம் ஆண்டு செப்டம்பரில் சொத்தை பொறுப்பேற்கச் சென்றபோது பிரதிவாதிகள் இடையூறு விளைவித்ததாகக் காவல்நிலையத்தில் முறைப்பாடு செய்யப்பட்டிருந்தது.

இந்தநிலையிலேயே, அந்தச் சொத்தின் சட்டப்பூர்வ உரிமையாளர் மக்கள் விடுதலை முன்னணி தான் எனப் பிரகடனப்படுத்துமாறும், ஆக்கிரமிப்பாளர்களை வெளியேற்றிப் பொறுப்பைத் தமக்கு வழங்குமாறும் கோரித் தொடரப்பட்ட வழக்கிலேயே கம்பஹா மாவட்ட நீதிமன்றம் இந்த இடைக்காலத் தடை உத்தரவைப் பிறப்பித்துள்ளது.