இலங்கையின் கடன் தரப்படுத்தலை 'B-' ஆக உயர்த்தியது ஃபிட்ச் ரேட்டிங்ஸ்!

இலங்கையின் நீண்டகால கடன் வழங்குநர் இயல்புநிலை தரப்படுத்தலை 'CCC+' என்பதிலிருந்து 'B-' ஆக உயர்த்தியுள்ளதாக ஃபிட்ச் ரேட்டிங்ஸ் (Fitch Ratings) கடன் தரப்படுத்தல் நிறுவனம் அறிவித்துள்ளது.

அத்துடன், நாட்டின் பொருளாதார தொலைநோக்கு நிலையை 'நிலையானது' (Stable) என்றும் குறிப்பிட்டுள்ளது.

கட்டமைப்பு சீர்திருத்தங்களின் அடிப்படையில் நடைமுறைப்படுத்தப்பட்ட பேரின-ஸ்திரத்தன்மைக் கொள்கைகள் (Macro-stabilization policies), நாட்டின் வெளிநாட்டு நிதி அபாயங்களைக் குறைத்து, பொருளாதார அதிர்ச்சிகளைத் தாங்கும் திறனை வழங்கியுள்ளதை இந்த தரப்படுத்தல் பிரதிபலிக்கிறது.

நிதி மற்றும் வெளிநாட்டுச் சமநிலைகளில் ஏற்பட்டுள்ள கூர்மையான முன்னேற்றங்கள் மற்றும் வெளிநாட்டு கையிருப்பு ஓரளவு மீளக் கட்டியெழுப்பப்பட்டுள்ளமை இதற்கு முக்கியக் காரணங்களாகும்.

நிதியியல் ஒழுக்கம் மற்றும் வருவாய் திரட்டல் முயற்சிகள் அரசாங்கத்தின் கடன் மற்றும் மொத்த உள்நாட்டு உற்பத்தி விகிதத்தைச் சரிவுப் பாதையில் வைத்திருப்பதுடன், வெளிநாட்டுச் சமநிலையின்மையைக் குறைக்கவும் வழிவகுக்கும்.

இருப்பினும், சமீபத்திய கடன் மறுசீரமைப்பு மற்றும் பேரின-பொருளாதார சீரமைப்புகள் மேற்கொள்ளப்பட்ட போதிலும், இலங்கையின் கடன் சுயவிவரமானது, ஏனைய நாடுகளுடன் ஒப்பிடுகையில் இன்னமும் அதிகமாக இருக்கும் அரசாங்கக் கடன் மற்றும் கடனைத் திரும்பச் செலுத்தும் விகிதங்களால் சவால்களை எதிர்நோக்கியுள்ளது.

மேலும், அடுத்த ஐந்து ஆண்டுகளில் வெளிநாட்டுக் கடனைத் திரும்பச் செலுத்தும் அளவு அதிகரிப்பதைக் கருத்திற்கொள்ளும்போது, வெளிநாட்டுச் செலாவணி கையிருப்பு தாங்கல்கள் இன்னமும் மிதமான அளவிலேயே காணப்படுகின்றன.