உலக சந்தையில் எரிபொருள் விலை உயர்வு - மக்களின் சுமையைக் குறைக்க அரசாங்கம் தீர்மானம்!

உலக சந்தையில் எரிபொருள் விலைகள் உயர்ந்து வரும் நிலையில், அதன் முழுமையான சுமையையும் மக்கள் மீது சுமத்தாமல் ஒரு பகுதியை அரசாங்கமே ஏற்றுக்கொள்ளத் தீர்மானித்துள்ளதாக எரிசக்தி அமைச்சர் அனுர கருணாதிலக்க குறிப்பிட்டுள்ளார்.

நாடாளுமன்றத்தில் இன்று (23) உரையாற்றும் போதே அமைச்சர் இவ்வாறு குறிப்பிட்டுள்ளார்.

இந்த மாத இறுதியில் மேற்கொள்ளப்படவுள்ள எரிபொருள் விலை திருத்தத்தின் போது, உலக சந்தை விலை உயர்வால் ஏற்படும் அழுத்தத்தின் ஒரு பகுதியை அரசாங்கம் ஏற்றுக் கொள்ள நடவடிக்கை எடுக்கப்படும் என்றும் அவர் கூறினார்.

ஒவ்வொரு மாதமும் இறுதியில் எரிபொருள் விலைகள் மீளாய்வு செய்யப்படுவதாகக் குறிப்பிட்ட அமைச்சர், தற்போதைய நிலவரம் குறித்த தகவல்கள் இன்று மக்களுக்கு அறியத்தரப்படும் என்றார்.

உலக சந்தையில் எரிபொருள் விலைகள் மீண்டும் அதிகரித்துள்ள போதிலும், அதன் முழுமையான தாக்கத்தை இலங்கையிலுள்ள நுகர்வோர் மீது சுமத்த அரசாங்கம் எதிர்பார்க்கவில்லை என அவர் வலியுறுத்தினார்.

உலக சந்தையில் எரிபொருள் விலை உயர்வின் போது கடந்த ஏப்ரல், மே மற்றும் ஜூன் மாதங்களிலும் அரசாங்கம் இவ்வாறே சுமையின் ஒரு பகுதியை ஏற்றுக்கொண்டதாக அமைச்சர் சுட்டிக்காட்டினார்.

"ஒரு பொறுப்புள்ள அரசாங்கம் என்ற வகையில், எரிபொருள் நுகர்வோர் மீது இந்த முழுச் சுமையையும் சுமத்தாமல், அதில் ஒரு பகுதியை அரசாங்கமே ஏற்க வேண்டும் என நாங்கள் நம்புகிறோம்," என்றும் அமைச்சர் அனுர கருணாதிலக்க தெரிவித்துள்ளார்.