කණ්ඩායම් 3ක් දික්අරාවේ ගිලා බැසීම ගැන සොයයි

බදුල්ල - ඇල්ල ප්‍රාදේශීය ලේකම් කොට්ඨාශයේ දික්අරාව ප්‍රදේශය ගිලා බැසීමේ අවදානම පිළිබඳ සොයා බැලීම සඳහා ගොඩනැගිලි පර්යේෂණ සංවිධානයේ කණ්ඩායම් තුනක් එම ප්‍රදේශයට ගොස් තිබෙනවා.

එම සංවිධානයේ නායයෑම් හා පර්යේෂණ හා අවදානම් කළමණාකරණ අංශයේ ප්‍රධානී ආර්.එම්.එස් බණ්ඩාර සඳහන් කළේ තමන් ඇතුලූ එම කණ්ඩායම මේ වන විට එහි නිරික්ෂණ කටයුතු සිදුකරමින් පවතින බවයි.

ඊට ඇල්ල ප්‍රාදේශීය ලේකම් කාර්යාලයේ නිලධාරින් පිරිසක් ද එක්ව සිටියා.

බදුල්ල - බණ්ඩාරවෙල, දියතලාව ප්‍රදේශවලට ඊයේ ඇදහැලූණු වර්ෂාවත් සමග ඇල්ල ප්‍රාදේශීය ලේකම් කොට්ඨාශයේ දික්අරාව ප්‍රදේශය ගිලා බැසීමේ අවදානම නිසා එහි පවුල් කිහිපයක් ඉවත් කිරීමට පියවර ගැණුනා.

අනතුරුව ඔවුන් බණ්ඩාරවෙල යොවුන් සේනාංක මධ්‍යස්ථානයේ රැඳවීමට කටයුතු කල බවයි ආපදා කලමනාකරණ මධ්‍යස්ථානය සදහන් කලේ.

මේ අතර, උමා ඔය ව්‍යාපෘතිය හේතුවෙන් පීඩාවට පත්වූ පිරිසක් අද උදෑසන බණ්ඩාරවෙල - බදුල්ල මාර්ගය ස්ථාන දෙකකින් අවහිර කරමින් විරෝධතාවයේ නිරත වුනා.

ඒ, දික්අරාව සහ බිදුනුවැව පීල්ල මංසන්ධියෙන්.

එම විරෝධතා සඳහා ඊයේ නිවාසවලින් ඉවත් කළ පිරිස් ද එක්ව සිටියා.  

පසුව, අදාළ ස්ථානවලට පොලිස් නිළධාරීන් සමග පැමිණි ඇල්ල ප්‍රාදේශීය ලේකම්වරිය ගැටලූව සඳහා විසදුම් ලබා දෙන බව පැවසීමත් සමග ඔවුන් විරෝධතාව අවසන් කළා.

කෙසේ වෙතත්, අද පස්වරුවේ ද දික්අරාව ප්‍රදේශයේ දී උමා ඔය ව්‍යාපෘතියෙන් පීඩාවට පත් පිරිසක් යලි විරෝධතාවක නිරත වුණා.