හිටපු ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩි අත්අඩංගුවට

ශ්‍රී ලංකා පොලිසියේ කීර්තිමත් නිලධාරියෙක් ලෙස නමක් දිනා සි‍ටි විශ්‍රාමික ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩිව අපරාධ පරීක්ෂණ දෙපාර්තමේන්තුවේ විශේෂ පොලිස් කණ්ඩායමක් විසින් අද (28) පස්වරුවේ අත්අඩංගුවට ගෙන තිබෙනවා.

විදෙස්ගතව සිටින පාතාලයේ අපරාධකරුවෙක්වන කෙහෙල්බද්දර පද්මේ නමින් කළ තර්ජනය කිරීමක් සම්බන්දයෙන් කළ විමර්ශනයකින් හෙළිවූ තොරතුරු අනුවයි මෙම අත්අඩංගුවට ගැනීම සිදුව ඇත්තේ.

හිටපු මහජන ආරක්ෂක ඇමති ටිරාන් අලස්, පොලිස් පරිපාලන අංශයේ වැඩ බලන ප්‍රධානී ජ්‍යෙෂ්ඨ නියෝජ්‍ය පොලිස්පති ලලිත් පතිනායක, සහ දේශබන්දු තෙන්නකෝන්ගේ පුතාට තර්ජනාත්මක ඇමතුම් කෙහෙල් බද්දර පද්මේ නමින් දුරකථන ඇමතුම් ලබාදීම මෙහෙයවා ඇත්තේ ප්‍රියන්ත ජයකොඩි බව විමර්ශනවලින් අනාවරණය වී ඇති බවයි අප වර්තාකරු සඳහන් කළේ.

තමාටද ඔහු තර්ජනාත්මක ඇමතුමක් එහිදී ලබාගෙන තිබෙනවා.

ප්‍රියන්ත ජයකොඩිගේ සැලසුමට අනුව ඩුබායි දුරකථන ඇමතුමක් ලෙස එම තර්ජනාත්මක ඇමතුම් ලබා දුන් පානදුර පදිංචි පුද්ගලයෙක්ද අපරාධ පරීක්ෂණ දෙපාර්තමේන්තුවේ නිලධාරීන් විසින් අත්අඩංගුවට ගෙන තිබෙනවා.

තමාට ආරක්ෂාවක් ලබාගැනීම සඳහාඔහු මෙම සැලසුම දියත් කර තිබෙන බව හෙළි වී ඇත්තේ.

අත්අඩංගුවට ගැනීමෙන් අනතුරුව රෝගී තත්ත්වයක් පිළිබඳව සඳහන් කිරීමෙන් පසු පොලිස් ආරක්ෂාව යටතේ ඔහුව රාගම රෝහලට ඇතුලත් කර තිබෙනවා.