සජබ සමග එක්වීමට තනතුර බාධාවක් නම් ඉල්ලා අස්වෙන්නම් : රනිල් කියයි

එක්සත් ජාතික පක්ෂය සහ සමගි ජන බලවේග පක්ෂය එක්වීමට තම තනතුර බාධාවක් නම් පක්ෂ නායකත්වයෙන් ඉවත්වීමට සූදානම් බව එක්සත් ජාතික පක්ෂ නායක රනිල් වික්‍රමසිංහ ප්‍රකාශ කර තිබෙනවා.

ඔහු මේ බව පවසා ඇත්තේ සිරිකොත පක්ෂ මූලස්ථානයේ ඊයේ පැවති තෘත්‍යාධිකාරී මණ්ඩල රැස්වීමට එක්වෙමින්.

එක්සත් ජාතික පක්ෂයේ ඉදිරි දේශපාලන කටයුතු සම්බන්ධයෙන් සාකච්ඡා කිරීමට එම පක්ෂයේ කෘත්‍යාධිකාරී මණ්ඩලය ඊයේ රැස්වූ අතර, එම රැස්වීමේදී කරුණු රැසක් දීර්ඝ වශයෙන් සාකච්ඡා කර තිබෙනවා.

එක්සත් ජාතිකන පක්ෂය සහ සමගි ජන බලවේගය එක්ව ගොඩනගන සන්ධානය පිළිබඳ වැඩි වශයෙන් අවධානය යොමුකර ඇති බවයි වාර්තා වන්නේ.

එහිදී එක්සත් ජාතික පක්ෂ නායක රනිල් වික්‍රමසිංහ ප්‍රකාශ කර ඇත්තේ, ඉක්මනින් මේ පිළිබඳ එකඟතාවකට පැමිණිය යුතු බවයි.

කෙසේ වෙතත් ගොඩ නගන සන්ධානය පිළිබඳ සමගි ජනබලවේග නායක විපක්ෂ නායක සජිත් ප්‍රමදාසගේ ප්‍රතිචාරය තවමත් ලැබී නොමැති බවද එහිදී අනාවරණ වී තිබෙනවා.

එක්සත් ජාතික පක්ෂය සහ සමගි ජන බලවේගය ගොඩනගන සන්ධානය පිළිබඳ මීට පෙර අවස්ථා ගණනාවකදී දෙපාර්ශ්වයේ නියෝජිතයින් අතර සාකච්ඡා පවත්වා තිබෙනවා.