මහ පාරේ සෙල්ලම් දැමූ බයික් කොල්ලන්ට වැඩ වරදී

මාලබේ චන්ද්‍රිකා කුමාරතුංග මාවතේ පිහිටි පෞද්ගලික විශ්ව විද්‍යාලයක් ආසන්නයේ අපරික්ෂාකාරී ලෙස යතුරුපැදි සංදර්ශණ පැවැත් වූ තරුණයින් 22ක් එම යතුරුපැදි සමගින් අත්අඩංගුවට ගත් බව කඩුවෙල පොලිසිය පවසනවා.

මාර්ගයේ ගමන් ගන්නා පුද්ගලයින්ට බාධා වන ලෙස තරුණයින් කණ්ඩායමක් යතුරුපැදි සංදර්ශණයක් පවත්වන බවට කඩුවෙල පොලිසියේ රථ වාහන අංශයේ ස්ථානාධිපතිවරයාට ලද තොරතුරකට අනුවයි පොලිස් කණ්ඩායම් ගොස්, කිසිවෙකුට පැන යාමට නොහැකි වන සේ අදාළ ස්ථානය වටකර සැකකරුවන් සහ යතුරුපැදි අත්අඩංගුවට ගැනීමට මෙලෙස කටයුතු කර ඇත්තේ.

වට්ස්ඇප් සමූහයක් ඔස්සේ මෙම තරුණයින් පිරිස සම්බන්ධ වී එම ස්ථානයට පැමිණ අපරික්ෂාකාරී ලෙස මහජනතාවට පීඩාවට පත්වන අයුරින් යතුරුපැදි සංදර්ශණ පවත්වා ඇති බව පොලිසිය පවසනවා.

මෙසේ අත්අඩංගුවට ගත් යතුරුපැදි 22 අතර මෙරට ලියාපදිංචි නොකළ යතුරුපැදි දෙකක් ද තිබී හමුවී ඇති බව සඳහන්.

අත්අඩංගුවට ගත් සැකකාර තරුණයින් 22ම කඩුවෙල පොලිස් බල ප්‍රදේශයෙන් පිටත පොලිස් බල ප්‍රදේශවල පදිංචිකරුවන්.

සැකකරුවන් පොලිස් ඇප මත මුදා හැරීමට කටයුතු කර ඇති අතර, ලබන 05 වැනිදා කඩුවෙල මහෙස්ත්‍රාත් අධිකරණය හමුවේ පෙනී සිටිය යුතු බවද පොලිසිය සඳහන් කරනවා.