ස්ථානමාරුවීම් ගැටළුවක් නිසා සුවසැරිය වැඩ වරයිද?

සේවකයන්ගේ ස්ථානමාරුවීම් සම්බන්ධයෙන් වන ගැටළුවක් මූල් කරගනිමින් සුව‍සැරිය හදිසි ගිලන් රථ සේවාවේ සේවකයින් අද (03) සිට වැඩ වර්ජනයකට සුදානම් වන බවට ආරංචි මාර්ග සඳහන් කරනවා.

මේ සම්බන්ධයෙන් හිරු ප්‍රවෘත්ති අංශය සුව සැරිය ගිලන් රථ සේවාවේ මෙහෙයුම් ප්‍රධානී ‍ලුතිනන් කර්නල් සුනෙත් ජිවන් ප්‍රනාන්දුගෙන් කළ විමසීමකදී ඔහු සඳහන් කළේ, එවැන්නක් තමන්ට දැනගැනීමට නොලැබුණු අතර, එහෙත් දිගුකාලීනව සේවය කළ නිලධාරීන්ගේ ස්ථාන මාරුවීම් සම්බන්ධයෙන් ස්ථාන මාරුවීම් ප්‍රතිපත්තියක් සකස් කර ඇති බවත් ඒ පිළිබඳව අර්බුධකාරී තත්ත්වයක් මතුව ඇති බවත්ය.

සුව සැරිය ගිලන්රථ සේවාව අත්‍යාවශ්‍ය සේවාවක් වන බවත් මේ වන විටත් එම සේවාව සාමාන්‍ය පරිදි ක්‍රියාත්මක වන බවත් මෙහෙයුම් ප්‍රධානියා වැඩිදුරටත් පැවසුවා.

මේ සම්බන්ධයෙන් අප සෞඛ්‍ය හා ජනමාධ්‍ය අමාත්‍ය මාධ්‍ය ලේකම් දීප්ති විජේතුංග ගෙන් ද විමසීමක් කළා.

එහිදී හෙතෙම සඳහන් කළේ මෙම සිද්ධිය සම්බන්ධයෙන් සුවසැරිය ගිලන් රථ සේවාව මගින් නිල මාධ්‍ය නිවේදනයක් නිකුත් කිරීමට සුදානම් ව ඇති බවයි.