මෝල්ටාව අසලදී සංක්‍රමණිකයන් රැගත් යාත්‍රාවක් පෙරළෙයි: 10 දෙනෙකු ජීවිතක්ෂයට

%E0%B6%B8%E0%B7%9D%E0%B6%BD%E0%B7%8A%E0%B6%A7%E0%B7%8F%E0%B7%80+%E0%B6%85%E0%B7%83%E0%B6%BD%E0%B6%AF%E0%B7%93+%E0%B7%83%E0%B6%82%E0%B6%9A%E0%B7%8A%E2%80%8D%E0%B6%BB%E0%B6%B8%E0%B6%AB%E0%B7%92%E0%B6%9A%E0%B6%BA%E0%B6%B1%E0%B7%8A+%E0%B6%BB%E0%B7%90%E0%B6%9C%E0%B6%AD%E0%B7%8A+%E0%B6%BA%E0%B7%8F%E0%B6%AD%E0%B7%8A%E2%80%8D%E0%B6%BB%E0%B7%8F%E0%B7%80%E0%B6%9A%E0%B7%8A+%E0%B6%B4%E0%B7%99%E0%B6%BB%E0%B7%85%E0%B7%99%E0%B6%BA%E0%B7%92%3A+10+%E0%B6%AF%E0%B7%99%E0%B6%B1%E0%B7%99%E0%B6%9A%E0%B7%94+%E0%B6%A2%E0%B7%93%E0%B7%80%E0%B7%92%E0%B6%AD%E0%B6%9A%E0%B7%8A%E0%B7%82%E0%B6%BA%E0%B6%A7

මෝල්ටාව (Malta) දූපත් රාජ්‍යයට ආසන්න මුහුදේදී සංක්‍රමණිකයන් රැගත් බෝට්ටුවක් පෙරළී යාමෙන් අවම වශයෙන් පුද්ගලයන් 10 දෙනෙකු ජීවිතක්ෂයට පත්ව ඇති බව ඉතාලි වෙරළාරක්ෂක බලකාය පවසන බව විදෙස් මාධ්‍ය වාර්තා කරනවා.

ලිබියානු වෙරළ තීරයෙන් ගමන් ආරම්භ කර ඇති මෙම යාත්‍රාව අනතුරට පත්වන අවස්ථාවේදී එහි 60 දෙනෙකුට ආසන්න පිරිසක් ගමන් කරමින් සිට ඇති බව බලධාරීන් තහවුරු කර ඇති බවයි විදෙස් මාධ්‍ය වාර්තාවේ සඳහන්.

ඉතාලි වෙරළාරක්ෂක බලකාය නිවේදනයක් නිකුත් කරමින් කියා සිටියේ, සංක්‍රමණිකයන් රැගත් යාත්‍රාවක් පෙරළී මිනිසුන් මුහුදට වැටී ඇති බවට වාර්තා වීමත් සමඟ, සෙවීමේ සහ මුදාගැනීමේ මෙහෙයුම් සඳහා මෝල්ටා රාජ්‍යය තමන්ගෙන් සහය ඉල්ලා සිටි බවයි.

ඒ අනුව ක්‍රියාත්මක වූ ඉතාලි මුර සංචාරක යාත්‍රාවක් මඟින් මේ වන විට මළ සිරුරු 10ක් සොයාගෙන ඇති අතර, අතුරුදන් වූවන් සෙවීමේ මෙහෙයුම් අඛණ්ඩව ක්‍රියාත්මක බවත් එම වාර්තාවේ සඳහන්.

මේ අතර, එම මුහුදු ප්‍රදේශයේ ගමන් කරමින් තිබූ ධීවර යාත්‍රාවක් මඟින් අනතුරට පත් වූවන් 48 දෙනෙකු පමණ ජීවතුන් අතර බේරා ගැනීමට සමත්ව ඇතැයි ද එම වාර්තාවේ සඳහන්.