''උද්ධමන‍ය 2-3% දක්වා අඩු කරන්න'' රවීගෙන් විශේෂ ආර්ථික යෝජනාවලියක්

2026 ඔක්තෝබර් මාසයේදී සිදු කිරීමට නියමිත මූල්‍ය ප්‍රතිපත්ති රාමු ගිවිසුම (MPFA) නීත්‍යානුකූලව සමාලෝචනය කිරීමට පෙර, ශ්‍රී ලංකාවේ මධ්‍යකාලීන උද්ධමන ඉලක්කය දැනට පවතින 5% සීමාවේ සිට 2% ත් 3% ත් අතර මට්ටමකට අඩු කරන ලෙස හිටපු මුදල් අමාත්‍ය සහ පාර්ලිමේන්තු මන්ත්‍රී රවී කරුණානායක ජනාධිපති මෙන්ම මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍ය අනුර කුමාර දිසානායකගෙන් ලිඛිතව ඉල්ලා සිටිනවා.

2023 ඔක්තෝබර් 5 වන දින එවකට ජනාධිපති රනිල් වික්‍රමසිංහ සහ ශ්‍රී ලංකා මහ බැංකුවේ අධිපති ආචාර්ය පී. නන්දලාල් වීරසිංහ විසින් අත්සන් කරන ලද මෙම මූල්‍ය ප්‍රතිපත්ති රාමු ගිවිසුම, 2023 අංක 16 දරන ශ්‍රී ලංකා මහ බැංකු පනත ප්‍රකාරව සෑම වසර 3කට වරක්ම සමාලෝචනය කළ යුතු අතර, එහි ඊළඟ නිල සමාලෝචනය මෙලෙස 2026 ඔක්තෝබර් මාසයට යෙදී තිබෙනවා.

රවී කරුණානායක පෙන්වා දෙන්නේ 5% ක උද්ධමන ඉලක්කයක් දීර්ඝකාලීනව පවත්වා ගැනීම නිසා මහජනතාවගේ සැබෑ ක්‍රය ශක්තිය අඛණ්ඩව ක්ෂය වන බවයි.

ඉන්දියාව, ඉන්දුනීසියාව, චීනය, ඕස්ට්‍රේලියාව, මලයාසියාව ඇතුළු ලොව ප්‍රමුඛ ආර්ථිකයන් මෙන්ම යුරෝපා මහ බැංකුව (ECB) සහ ඇමරිකානු ෆෙඩරල් රිසර්ව් වැනි ආයතන සිය උද්ධමන ඉලක්ක 2% වැනි ඉතා අඩු මට්ටමක පවත්වා ගන්නා ආකාරය උදාහරණ ලෙස දක්වමින් ඔහු මෙම යෝජනාව ඉදිරිපත් කර තිබෙනවා.

ඉදිරි ඔක්තෝබර් සමාලෝචනය ඉලක්ක කර ගනිමින් රවී කරුණානායක විසින් ප්‍රධාන යෝජනා 5ක් ජනාධිපතිවරයා වෙත ඉදිරිපත් කර තිබෙනවා.

ඒ අනුව, මධ්‍යකාලීන උද්ධමන ඉලක්කය 2% ත් 3% ත් අතර පරාසයකට වහාම අඩු කිරීම සහ ප්‍රතිපත්තිමය විශ්වසනීයත්වය හා වගවීම ශක්තිමත් කිරීම සඳහා උද්ධමන විචල්‍යතා පරාසයන් (Variance Bands) අවම මට්ටමක රඳවා ගැනීම එහි ප්‍රධාන වනවා.

එමෙන්ම විදේශ විනිමය සංචිත ගොඩනැගීම, දේශීය ඉතුරුම් ප්‍රවර්ධනය, ප්‍රාග්ධන සම්පාදනය, ඵලදායී ආයෝජන සහ අපනයන තරගකාරීත්වය ඉහළ නැංවීම මූල්‍ය ප්‍රතිපත්තියේ සෘජු හා පැහැදිලි අංගයන් බවට පත් කළ යුතු බවත්, උද්ධමනය, සංචිත වර්ධනය, විනිමය අනුපාතිකයේ ස්ථාවරත්වය සහ සමස්ත ආර්ථික වර්ධනය අතර පවතින සබැඳියාව පිළිබඳව පාර්ලිමේන්තුව වෙත විනිවිදභාවයකින් යුත් පුළුල් වාර්තාකරණයක් ක්‍රියාත්මක කළ යුතු බවත් ඔහු යෝජනා කර සිටිනවා.

මීට අමතරව ශ්‍රී ලංකාවේ ඓතිහාසික ගෙවුම් ශේෂ (Balance of Payments) අවදානම් මැනවින් සැලකිල්ලට ගනිමින්, දිගුකාලීන මූල්‍ය ස්ථාවරත්වය සහ දේශීය සම්පත් සමුච්චයනය ශක්තිමත් කිරීමේ ස්ථාවර රාමුවක් සැකසීමේ අවශ්‍යතාවය ද එම යෝජනාවලිය මඟින් වැඩිදුරටත් අවධාරණය කර තිබෙනවා.